फर यु फीडमा कुन हदसम्म एआई निर्मित सामग्री हेर्ने भन्ने छनोट सुविधा ल्याउँदै टिकटक

काठमाडौं ।

सुरूमा प्रयोगकर्ताद्वारा बनाइने सामग्रीका लागि मात्र प्रयोग हुने एप टिकटकले अब प्रयोगकर्ताले आफ्नो “फर यु” फिडमा कति एआई-निर्मित सामग्री हेर्न चाहन्छन् भनेर छनोट गर्न पाउने नयाँ सेटिङ ल्याउँदैछ। कम्पनीले एआई-निर्मित सामग्रीलाई चिन्हित गर्ने उन्नत प्रविधिहरू पनि जोड्दैछ।

नयाँ एआई-निर्मित सामग्री (एआईजीसी) नियन्त्रण “म्यानेज टपिक्स” उपकरण भित्र रोलआउट हुँदैछ, जसले प्रयोगकर्तालाई टिकटक मा देखिने सामग्री छनोट गर्न मद्दत गर्छ।

“म्यानेज टपिक्सले नाच, खेलकुद, खाना तथा पेयजस्ता १० भन्दा बढी कोटिहरूका सामग्री कति देखाउने भनेर प्रयोगकर्ताले पहिलेदेखि नै मिलाउन सक्छन्,” टिकटक ले ब्लगपोस्टमा बताएको छ। “यस्तै एआईजीसी सेटिङ पनि फिडमा आउने विविध सामग्रीलाई मिलाउनकै लागि हो, सामग्री पूर्णरूपमा हटाउन वा बदल्नका लागि होइन।”

यो कदम ओपनएआई र मेटाजस्ता कम्पनीहरूले एआई-मात्र सामग्री फिड अपनाइरहेका बेला आएको हो। सेप्टेम्बरमा मेटाले छोटो एआई-निर्मित भिडियोहरू सिर्जना र साझा गर्न ‘भाइब्स’ नामको नयाँ फिड ल्यायो। केही दिनपछि ओपनएआईले सोरा नामको प्लेटफर्म सार्वजनिक गर्‍यो, जसले एआई-निर्मित भिडियोहरू बनाउने र पोस्ट गर्ने सुविधा दिन्छ।

टेकक्रञ्चका अनुसार सोरा सार्वजनिक भएयता टिकटकमा यथार्थपरक एआई-निर्मित भिडियोहरू देखिन थालेका छन्। धेरै प्रयोगकर्ताहरू इतिहास वा सेलिब्रिटीसम्बन्धी पोस्ट बनाउन पनि एआई-द्वारा बनाइएका दृश्यहरू प्रयोग गरिरहेका छन्।

टिकटकका अनुसार, नयाँ एआईजीसी नियन्त्रणसँगै प्रयोगकर्ताले यस्तो सामग्री कम देख्न चाहन्छन् भने घटाउन सक्छन्, धेरै मनपर्छ भने बढाउन सक्छन्। प्रयोगकर्ताले सेटिङ्समा गएर “कन्टेन्ट प्रेफरेन्सेज” चयन गरी “म्यानेज टपिक्स” मा क्लिक गरेपछि विभिन्न विषयका स्लाइडरहरू समायोजन गर्न सक्छन्, जसमा एआई-निर्मित सामग्री पनि समावेश छ।

टिकटक ले परिवर्तन आगामी हप्ताहरूमा रोलआउट हुने जनाएको छ। एआई-निर्मित सामग्रीलाई अझ प्रभावकारी रूपमा चिन्हित गर्न टिकटक अब “इन्भिजिबल वाटरमार्किङ” नामको प्रविधि परीक्षण गरिरहेको छ।

टिकटक पहिले नै यथार्थपरक एआई-निर्मित सामग्रीमा लेबल अनिवार्य गर्छ र सीटुपीएको कन्टेन्ट क्रेडेन्शियल्स प्रविधि प्रयोग गर्छ, जसले सामग्रीमा मेटाडाटा राखेर त्यो एआई-निर्मित हो कि होइन भन्ने पत्ता लगाउन मद्दत गर्छ। तर टिकटकले यी लेबलहरू अन्य प्लेटफर्ममा सामग्री पुन:अपलोड वा सम्पादन गर्दा हटाइने सम्भावना हुने बताएको छ।

नयाँ “इन्भिजिबल वाटरमार्क्स” का साथ टिकटकले यस्तो वाटरमार्क थप्दैछ, जुन उसैलाई मात्र पढ्न मिल्नेछ। यसले अन्यले वाटरमार्क हटाउन कठिन बनाउनेछ।

टिकटकले आफ्नै उपकरण, जस्तै एआई एडिटर प्रो बाट बनेको एआई-निर्मित सामग्रीमा अदृश्य वाटरमार्क राख्न थाल्नेछ। सीटुपीएको कन्टेन्ट क्रेडेन्शियल्स सहित अपलोड गरिएका सामग्रीमा पनि वाटरमार्क थपिनेछ।

कम्पनीका अनुसार यसले एआई-निर्मित सामग्रीलाई अझ भरपर्दो रूपमा लेबल गर्न मद्दत गर्नेछ। टिकटकले आफ्नो प्लेटफर्ममा बनेको एआई सामग्रीमा सीटपीएको क्रेडेन्शियल्स पनि निरन्तर पढ्ने बताएको छ।

यी प्रयासहरूका साथै टिकटक ले २० लाख डलरको एआई साक्षरता कोष सुरु गर्ने घोषणा गरेको छ, जसले गर्ल्स हु कोड जस्ता विज्ञहरूलाई एआई-सम्बन्धी सिकाइ र सुरक्षाबारे जनचेतनामूलक सामग्री बनाउन सहयोग गर्नेछ।