च्याट लग उपलब्ध गराउन दिइएको आदेश उल्ट्याइदिन च्याटजीपीटीद्वारा न्यूयोर्कका न्यायाधीशलाई आग्रह

काठमाडौं ।

ओपनएआईले न्यूयोर्कको एक संघीय न्यायाधीशलाई बुधबार आफूलाई २ करोड बेनामे च्याटजीपीटी च्याट लग उपलब्ध गराउन आदेश दिने निर्णय उल्टाइयोस् भन्ने अनुरोध गरेको छ।

यसले प्रयोगकर्ताहरूका निजी वार्तालाप सार्वजनिक गराउने भएकाले कम्पनीले यस्तो अनुरोध गरेको हो। यो आदेश न्यूयोर्क टाइम्स र अन्य समाचार संस्थाहरूले दायर गरेको प्रतिलिपि अधिकार उल्लङ्घन मुद्दासँग सम्बन्धित छ।

कृत्रिम बुद्धिमत्ता कम्पनीले अभिलेखहरू बुझाउँदा गोप्य प्रयोगकर्ता जानकारी खुल्ने र ती मध्ये “९९.९९ प्रतिशत” कुराकानीहरू उक्त मुद्दासँग कुनै सम्बन्ध नभएको बताएको छ।

“स्पष्ट हुनका लागि, गत तीन वर्षमा जसले पनि च्याटजीपीटी प्रयोग गरेका छन्, उनीहरूका व्यक्तिगत कुराकानीहरू न्यूयोर्क टाइम्सलाई अनावश्यक रूपमा हेर्नका लागि बुझाइने सम्भावना अब रहेको छ,” कम्पनीले अदालतमा दायर कागजातमा भनेको छ।

समाचार संस्थाहरूले च्याटजीपीटीले उनीहरूको प्रतिलिपि अधिकारयुक्त सामग्री पुनःउत्पादन गरेको छ कि छैन भन्ने प्रमाणित गर्न सकियोस् र ओपनएआई ले उनीहरूले प्रमाण बनाउन च्याटबट ह्याक गरेको भन्ने दाबी अस्वीकार गर्न सकियोस् भन्नका लागि ती अभिलेखहरू आवश्यक भएको धारणा राखेका छन्।

उनीहरूको मुद्दाले ओपनएआईले आफ्ना लेखहरू प्रयोग गरी च्याटजीपीटीलाई प्रयोगकर्ताका प्रश्नहरूमा जवाफ दिन तालिम दिएको आरोप लगाएको छ।

मजिस्ट्रेट न्यायाधीश ओना वाङले आदेशमा प्रयोगकर्ताको गोपनीयता कम्पनीको “पूर्णरूपमा पहिचान हटाउने प्रक्रिया” र अन्य सुरक्षात्मक उपायहरूले सुरक्षित गरिनेछ उल्लेख गरेकी छिन्। ओपनएआईलाई शुक्रबारसम्म ती अभिलेख बुझाउने समय दिइएको छ।

ओपनएआईका सूचना सुरक्षा प्रमुख डेने स्टुकीले बुधबार ब्लग पोस्टमार्फत अभिलेखहरू साझेदारी गर्नु गोपनीयता र सुरक्षाका सिद्धान्तविरुद्ध हुने र “आफूहरुलाई न्यूयोर्क टाइम्सको आधारहीन मुद्दासँग कुनै सम्बन्ध नभएका लाखौं मानिसका व्यक्तिगत कुराकानीहरू बुझाउन बाध्य पार्ने” बताएका छन्।

न्यूयोर्क टाइम्सका प्रवक्ताले भनेका छन्, “ओपनएआई को ब्लग पोस्टले जानाजानी प्रयोगकर्तालाई भ्रममा पारेको छ र वास्तविक तथ्य लुकाएको छ।”
“कुनै पनि च्याटजीपीटी प्रयोगकर्ताको गोपनीयता जोखिममा छैन,” प्रवक्ताले भने। “अदालतले ओपनएआईलाई आफैंले बेनामे बनाएका केही नमूना कुराकानीहरू कानूनी सुरक्षा अन्तर्गत बुझाउन आदेश दिएको हो।”

ओपनएआई विरुद्धको यो मुद्दा ती धेरै मुद्दामध्ये एक हो, जसमा प्रविधि कम्पनीहरूलाई प्रतिलिपि अधिकारयुक्त सामग्री एआई प्रणाली तालिमका लागि दुरुपयोग गरेको आरोप लगाइएको छ।