आगामी पाँच वर्षभित्र डाटा सेन्टर चिपबाट तीन गुणा बढ्ने एएमडीको अनुमान

काठमाडौं ।

एडभान्स्ड माइक्रो डिभाइसेस (एएमडी) ले आगामी पाँच वर्षभित्र डाटा सेन्टर चिपबाट वार्षिक १०० अर्ब डलर आम्दानी हुने र नाफा तीन गुणा बढ्ने अनुमान गरेको मंगलबार जनाएको छ।

क्यालिफोर्नियाको सान्टा क्लारास्थित चिप डिजाइन कम्पनीका सेयर बजार बन्द भएपछि २.७ प्रतिशतले घटेर २३७.५२ डलरमा रोकिए पनि बजार खुल्नेबित्तिकै अस्थिर कारोबारबीच ४ प्रतिशतले बढेका थिए।

अक्टोबर ६ पछि कम्पनीका सेयर मूल्यमा १६ प्रतिशत वृद्धि भएको छ। सो दिन एएमडीले ओपनएआईसँग बहुवर्षीय सम्झौता गरेको थियो, जसले कम्पनीलाई वार्षिक रूपमा दशौं अर्ब डलर आम्दानी गराउने अपेक्षा गरिएको छ।

यो सम्झौताले एनभिडियाको एआई चिप क्षेत्रमा वर्चस्व घटाउने सम्भावना नदेखाए पनि, एएमडी का चिपप्रति ठूलो विश्वासको संकेतका रूपमा हेरिएको छ। कम्पनीले मंगलबार सार्वजनिक गरेको उत्साहजनक आर्थिक अनुमानले लगानीकर्ताको चिन्ता कम गर्ने अपेक्षा गरिएको छ।

एएमडीका प्रमुख कार्यकारी लिसा सुले कम्पनीका डाटा सेन्टर चिपको बजार सन् २०३० सम्ममा १ ट्रिलियन डलरसम्म पुग्ने अनुमान गर्दै न्युयोर्कमा आयोजित विश्लेषक दिवसमा बताइन्।

कृत्रिम बुद्धिमत्ता (एआई) ले यस वृद्धिमा प्रमुख भूमिका खेल्ने उनले उल्लेख गरिन्। उक्त बजारमा एएमडी का सामान्य प्रोसेसर, नेटवर्किङ चिप र एआईका लागि बनाइएका विशेष चिपहरू समावेश हुने बताइयो।

“यो निकै रोमाञ्चक बजार हो,” सुले भनिन्। “डाटा सेन्टर अहिलेको सबैभन्दा ठूलो वृद्धि अवसर हो, र एएमडी यसका लागि निकै राम्रो अवस्थामा छ।”

आगामी तीनदेखि पाँच वर्षमा एएमडीले आफ्नो कुल व्यवसायमा वार्षिक ३५ प्रतिशत वृद्धि र डाटा सेन्टर व्यवसायमा ६० प्रतिशत वृद्धि हुने अनुमान गरेको छ, कम्पनीका वित्त प्रमुख जीन हुले बताए।

सो अवधिभित्र कम्पनीको आम्दानी प्रति सेयर २० डलरसम्म पुग्ने लक्ष्य राखिएको छ। एलएसईजीको अनुमान अनुसार एएमडी को २०२५ को नाफा प्रति सेयर २.६८ डलर हुने रोयटर्सले उल्लेख गरेको छ।