काठमाडौं ।
सोनीले २०२६ मार्च मा समाप्त हुने आर्थिक वर्षका लागि आफ्नो सञ्चालन नाफाको पूर्वानुमान ८ प्रतिशतले बढाएर १.४३ ट्रिलियन येन (९.५ अर्ब डलर) पुर्याएको छ।
कम्पनीले यस वृद्धि अमेरिकन शुल्कको अपेक्षाभन्दा कम प्रभाव र मनोरञ्जन तथा चिप्स व्यवसायको मजबुत प्रदर्शनका कारण भएको बताएको छ।
जुलाई–सेप्टेम्बर त्रैमासमा कम्पनीको सञ्चालन नाफा १० प्रतिशतले बढेर ४२९ अर्ब येन पुगेको छ। संगीत इकाइ (जसमा एनिमे समेत समावेश छ) र चिप्स व्यवसायमा बिक्री बढेको कम्पनीले जनाएको छ।
सोनीले एनिमेटेड चलचित्र डेमन स्लेयर: किमेत्सु नो याइबा इनफिनिटी क्यासल को सफलतालाई यसमा योगदान दिने प्रमुख कारणका रूपमा उल्लेख गरेको छ।
पहिले घरेलु इलेक्ट्रोनिक्सका लागि चर्चित सोनी पछिल्ला वर्षहरूमा मनोरञ्जन क्षेत्रमा अग्रणी बनेको छ र एनिमे उद्योगको वृद्धिमा भरोसा गरिरहेको छ।
तर दोस्रो त्रैमासमा गेम व्यवसायको नाफा घटेको छ, किनभने कम्पनीले डेस्टिनी २ भिडियो गेमसँग सम्बन्धित मूल्य ह्रास नोक्सानी लेखेको थियो।
स्टुडियो बङ्गी खरिद गर्दा कम्पनीले गरेको प्रयोगकर्ता सहभागिताको अपेक्षा पूरा नभएको मुख्य वित्तीय अधिकारी लिन ताओले बताएका छन्।
सोनीले यो त्रैमासमा आफ्नो २०२० मा लञ्च भएको प्लेस्टेशन ५ का ३.९ मिलियन युनिट बेचेको छ, जुन अघिल्लो वर्षको सोही अवधिभन्दा थोरै वृद्धि हो।
“हामी वर्षअन्त्यको बिक्री सिजनमा प्रयोगकर्ता आधार विस्तार गर्ने योजना बनाइरहेका छौँ, तर समग्र खण्डको नाफासँग सन्तुलन पनि कायम गर्नेछौँ,” ताओले बताएका छन्।
प्रकाशित: २६ कार्तिक २०८२, बुधबार
