विन्डोज ११ मा दुई सेटिङहरूले तपाईंको कम्प्युटरलाई सुस्त बनाउन सक्छन् – यसलाई कसरी समाधान गर्ने?

काठमाडौं ।

विन्डोज ११ मा स्वचालित रूपमा सक्षम गरिएका दुई सेटिङहरूले तपाईंको कम्प्युटरको पर्फर्मेन्सलाई उल्लेखनीय रूपमा असर गर्न सक्ने नेओविन पोर्टलले बताएको छ।

यदि कसैले विन्डोज ११ पहिले भन्दा सुस्त चलिरहेको फेला पारेको अवस्थामा समस्या सम्भवतः हार्डवेयरमा नभइ प्रणालीमा भएको बताइएको छ।

पहिलो कारण भनेको वानड्राइभको स्वचालित सिङ्किङ रहेको छ। यो सुविधाले तपाईंको कम्प्युटर र क्लाउड स्टोरेज बीच फाइलहरू निरन्तर जाँच गर्ने र अद्यावधिक गर्ने भएकोले तपाईंको प्रोसेसर र इन्टरनेट जडानमा तनाव दिन सक्ने जनइएको छ। विशेष गरी कमजोर डिभाइसहरूमा वा सिङ्क गर्न धेरै फाइलहरू हुँदा यस्तो समस्या हुने उल्लेख गरिएको छ।

त्यसैगरी दोस्रो कारणमा एनिमेसनहरू, सेमी–ट्रान्सप्यारेण्ट विन्डोजहरू र स्याडोजहरू जस्ता भिजुअल इन्टरफेस प्रभावहरू रहेका छन् र तिनीहरुले विन्डोजलाई आधुनिक रूप दिने भए पनि बढी मेमोरी (र्याम) र ग्राफिक्स स्रोतहरू खपत गर्दछन्। कम र्याम (विशेष गरी ८ जीबी भन्दा कम) भएका कम्प्युटरहरूमा यसले उल्लेखनीय रुपमा ढिलोपन निम्त्याउन सक्ने उल्लेख गरिएको छ।

माइक्रोसफ्टले यी सेटिङहरूले पर्फर्मेन्सलाई असर गर्न सक्ने पुष्टि गरेको छ र प्रयोगकर्ताहरूलाई उनीहरूको आवश्यकता अनुसार समायोजन गर्न सिफारिस गरेको छ।

हेभि (भारी) प्रोग्रामहरूसँग काम गर्दा वानड्राइभ सिंकलाई अस्थायी रूपमा रोक्न सकिने छ।

सिस्टम सेटिङहरूमा, “विन्डोजको अपियरेन्स र पर्फर्मेन्स समायोजन गर्दै” विकल्प खोलेर आवश्यक नभएका भिजुअल प्रभावहरू असक्षम गर्न सकिने छ।

नियमित रूपमा ड्राइभरहरू अपडेट गर्ने र पृष्ठभूमिमा कुन एप्लिकेसनहरू चलिरहेका छन् भनेर जाँच गर्न सकिने छ।

विशेष गरी यदि तपाईं पुरानो डिभाइस प्रयोग गर्दै हुनुहुन्छ भने यी साधारण परिवर्तनहरूले तपाईंको कम्प्युटरलाई कुनै अतिरिक्त लागत बिना गति दिन र यसको जीवन बढाउन सक्ने टेलीग्राफले रिपोर्ट गरेको छ।