आगामी वर्ष तीन नयाँ सहरमा आफ्नो रोबोट्याक्सी सेवा विस्तार गर्ने वेमोको तयारी

काठमाडौं ।

वेमोले आगामी वर्ष तीन नयाँ सहरमा आफ्नो रोबोट्याक्सी सेवा विस्तार गर्ने भएको छ। कम्पनीका चालकविहीन गाडीहरू सान डिएगो, लस भेगास र डिट्रोइटका सडकमा चल्ने भएका हुन्, जसअन्तर्गत कम्पनीले आफ्नो विस्तार योजनालाई तीव्र बनाएको छ।

एलबाबेटको स्वामित्वमा रहेको वेमोले ब्लगपोस्टमार्फत डिट्रोइटका बासिन्दाले छिट्टै सडकमा वेमोका गाडीहरू देख्न सक्ने बताएको छ। ती गाडीहरूले सर्वसाधारणका लागि सेवा सुरु हुनुअघि क्षेत्रमा नक्शांकन गर्नेछन्। सान डिएगोका लागि कम्पनीले “आगामी वर्षदेखि सेवा सुरु गर्ने योजना” रहेको जनाएको छ।

इन्ग्याजेटका अनुसार लस भेगासमा वेमोको सेवा क्षेत्रमा “द स्ट्रिप” समावेश हुनेछ र पछि विमानस्थलसम्म विस्तार गर्ने योजना रहेको छ। कम्पनी हाल लस एन्जलस, फिनिक्स, सान फ्रान्सिस्को, एटलान्टा र अस्टिनमा सञ्चालनमा छ। हालसालै मियामी र वाशिङ्टन डीसीमा पनि विस्तारको घोषणा गरिएको छ।

वेमोले आगामी वसन्तमा लन्डनमा पनि सेवा सुरु गर्ने योजना बनाएको छ। बेलायतको “अटोमेटेड भेहिकल्स एक्ट २०२४” कार्यान्वयनमा आएपछि देशमा पहिलोपटक चालकविहीन सवारी सञ्चालन गर्न अनुमति मिलेको हो। कम्पनीले हालै फिनिक्समा खाद्यान्न डेलिभरीका लागि डोरड्याससँग साझेदारी गर्ने घोषणा पनि गरेको छ।

अटोमेटेड ट्याक्सी बजार हाल तीव्र प्रतिस्पर्धामा छ। टेस्लाको रोबोट्याक्सी सेवा अस्टिन र सान फ्रान्सिस्कोमा विस्तार भइरहेको छ। उबर र ल्युसिडले पनि ल्युसिड ग्राभिटी एसयूभी प्रयोग गरेर आगामी वर्ष बे एरियामा चालकविहीन ट्याक्सी साझेदारी सुरु गर्ने तयारी गरेका छन्।