निसान र मर्सिडिजले यसकारण बन्द गरे मेक्सिकोमा स्थापना गरिएको संयुक्त कार उत्पादन प्लान्ट

काठमाडौं ।

निसान र डेमलरले सन् २०१५ मा मेक्सिकोको मध्य भागमा अवस्थित अग्वास्कालिएन्तेस प्लान्ट निर्माण गर्न सम्झौता गरेका थिए। यो ५०–५० को संयुक्त लगानी परियोजनाअन्तर्गत १ अर्ब डलर लगानी गरी सन् २०१७ मा इन्फिनिटी क्यूएक्स५० र क्यूएक्स५५ को उत्पादन सुरु गरिएको थियो।

टेलिग्राफका अनुसार सन् २०१८ मा मर्सिडीज ए-क्लास पनि उत्पादन लाइनमा सामेल भयो र सन् २०१९ मा जीएलबी मोडेल थपियो। तर ए-क्लासको उत्पादन छोटो अवधिमै रोकियो, सन् २०२० मा यो मोडेल बन्द गरियो। अब बाँकी मोडेलहरू पनि क्रमशः बन्द हुँदै गइरहेका छन्।

निसानका प्रवक्ता ब्रायन ब्रक्म्यानले वार्ड्सअटोलाई दिएको जानकारीअनुसार क्यूएक्स५० र क्यूएक्स५५ मोडेलको उत्पादन यसै महिनाको अन्त्यमा बन्द हुनेछ। यता मर्सिडीजका प्रवक्ताले अन्तिम जीएलबी क्रसओभर सन् २०२६ को मे महिनामा उत्पादन लाइनबाट निस्कने बताएका छन्।

आगामी वर्षको मध्यसम्म कुनै पनि गाडी उत्पादनमा नहुने भएकाले कारखाना पूर्ण रूपमा बन्द हुनेछ। अग्वास्कालिएन्तेस निसानले खर्च कटौतीका लागि सुरु गरेको पुनर्संरचना योजनाअन्तर्गत बन्द गर्न लागिएको सातमध्ये तेस्रो कारखाना हो। जापानको ओप्पामा कारखाना र मेक्सिकोको सिउदाद इन्डस्ट्रियल डेल भाये डे कुएर्नाभाका औद्योगिक पार्क पनि बन्द हुनेछन्।

यससँगै कम्पनीका डिजाइन स्टुडियोहरू सान डिएगो र साओ पाउलोमा पनि बन्द गरिँदैछन्। यद्यपि संयुक्त उत्पादन परियोजना अन्त्य हुँदै गए पनि इन्फिनिटीले क्यूएक्स६० लाई क्यूएक्स५० को उत्तराधिकारीका रूपमा र आगामी क्यूएक्स६५ मोडेललाई क्यूएक्स५५ को स्थानमा ल्याउने तयारी गरेको टेलिग्राफले उल्लेख गरेको छ।

कूपे शैलीको एसयूभी क्यूएक्स६५ मोनोग्राफ कन्सेप्टमार्फत प्रस्तुत गरिएको थियो, जसको सम्भावित बजार प्रवेश सन् २०२६ मा हुनेछ। मर्सिडीजतर्फ जीएलबी मोडेल दोस्रो पुस्तासँग अगाडि बढ्नेछ, जसमा दहन इन्जिन र विद्युतीय मोटर दुवै रहनेछन्, जसले नयाँ सीएलए लाई पनि झल्काउँछ।

निसानले रोजगार कटौतीमार्फत पुनरुत्थानको आशा राखेको छ। कारखाना र डिजाइन स्टुडियोहरू बन्द गर्ने निर्णय कम्पनीको २० हजार कर्मचारी कटौती योजनाको हिस्सा हो।

गाडीका प्लेटफर्महरूको संख्या १३ बाट घटाएर ७ मा ल्याइनेछ, वार्षिक उत्पादन पनि १० लाख घटाई २५ लाख एकाइमा सीमित गरिनेछ। पार्ट्सको जटिलता ७० प्रतिशतसम्म घटाइने अनुमान गरिएको छ, जसलाई “डिजाइन सरलीकरण” पहलले समर्थन गर्नेछ।

केही महिनाअघि गठन गरिएको लागत घटाउने कार्यदलले ४ हजार सम्भावित बचत उपाय पहिचान गरेको छ, जसमा १,६०० प्रभावकारी मानिएका छन्। उदाहरणका लागि, गाडीमा हेडरेस्टको संख्या घटाउँदा पनि कम्पनीले ठूलो रकम बचत गर्न सक्छ—अवस्था यति गम्भीर छ।

तर सबै समाचार नकारात्मक छैनन्। क्यूएक्स६५ सँगै निसानले नयाँ उत्पादनहरूको श्रृंखला ल्याउँदैछ। कम्पनीले नयाँ लिफ र सेन्ट्रा मोडेलहरू, साथै नयाँ पुस्ताको एलग्रान्ड मिनिभ्यान पहिले नै सार्वजनिक गरिसकेको छ।

चीन बजारका लागि दुई नयाँ सेडान (एन६ र टियाना) र एक फ्रन्टियर हाइब्रिड पिकअप ट्रक पनि तयार भइरहेका छन्। यसका अतिरिक्त, नयाँ रियर-ह्वील-ड्राइभ स्काइलाइन र यसको इन्फिनिटी संस्करण, साथै एक्सटे रा मोडेल सन् २०२८ मा फिर्ता आउने अपेक्षा गरिएको छ। पुनर्संरचना योजना र नयाँ उत्पादनहरूको लहरसँगै निसानले फेरि बजारमा आफ्नो स्थान मजबुत बनाउन सक्ने विश्वास गरेको छ।