एनभिडियाका मुख्य कार्यकारी अधिकृत जेन्सेन हुआङले कम्पनीका अत्याधुनिक ब्ल्याकवेल चिप चीनमा बेच्न पाउने आशा रहेको बताएका छन्। यद्यपि यसको अन्तिम निर्णय अमेरिकी राष्ट्रपति डोनाल्ड ट्रम्पले गर्नुपर्नेछ।
दश वर्षभन्दा बढी समयपछि पहिलोपटक दक्षिण कोरियाको आधिकारिक भ्रमणमा रहेका हुआङले यो टिप्पणी गरे, एक दिनअघि त्यहीँ ट्रम्प र चिनियाँ राष्ट्रपति सी चिनफिङबीच भेटवार्ता भएको थियो। उनले भने, “दुवै राष्ट्रपतिबीचको सफल भेटघाटले म निकै खुशी छु, तर उनीहरूले केबारे कुरा गरे भन्ने मलाई थाहा छैन।”
बिहीबारको वार्तापछि ट्रम्पले एयर फोर्स वनमा पत्रकारहरूलाई भनेका थिए कि सेमिकन्डक्टरबारे छलफल भएको छ र चीनले “एनभिडिया लगायत कम्पनीहरूसँग चिप खरिदबारे कुरा गर्ने” उल्लेख गरेका थिए। तर उनले थपे, “हामी ब्ल्याकवेलबारे कुरा गरिरहेका छैनौं।”
हुआङले भने, “हामी सधैं चीनमा फर्कने आशा राख्छौं, र म ठान्छु एनभिडियाको चीनमा उपस्थिति राम्रो छ । यो अमेरिकाको पनि हितमा छ, र चीनको पनि हितमा छ । त्यसैले म आशावादी छु कि कुनै दिन दुवै सरकारबीच यस्तो सहमति हुनेछ, जसले एनभिडियाको प्रविधि चीनमा निर्यात गर्न सक्ने बनाउँछ।”
अमेरिका–चीन तनाव
एनभिडियाका चिपमा चीनको पहुँच अमेरिकी–चिनियाँ प्रतिस्पर्धाको प्रमुख विषय बनेको छ, किनभने दुवै देश उच्चस्तरीय कम्प्युटिङ शक्ति र कृत्रिम बुद्धिमत्तामा प्रभुत्व जमाउन प्रयासरत छन्।
अमेरिकाले एनभिडियाका अत्याधुनिक एआई चिपहरूको चीनतर्फको बिक्रीमा निर्यात नियन्त्रण लगाएको छ, जसको उद्देश्य चीनको प्रविधिगत प्रगतिलाई, विशेषगरी सैन्य प्रयोजनमा प्रयोग हुन सक्ने क्षेत्रमा सीमित गर्नु हो ।
हुआङले ट्रम्प प्रशासनलाई यी प्रतिबन्धहरू केही खुकुलो बनाउन आग्रह गर्दै आएका छन्। उनका अनुसार, “चिनियाँ एआई प्रणालीको अमेरिकी हार्डवेयरमा निर्भरता अमेरिकाकै हितमा हो।”
स्रोतहरूका अनुसार, एनभिडिया अहिले चीनका लागि नयाँ चिप विकास गर्दैछ, जुन ब्ल्याकवेल आर्किटेक्चरमा आधारित हुनेछ। यो चिप चीनबाहिर बिक्री हुने मोडेलभन्दा कमजोर हुनेछ तर हाल चीनमा बेच्न अनुमति प्राप्त सबैभन्दा शक्तिशाली मोडेल एच२० भन्दा सक्षम हुनेछ।
तर चिनियाँ निजी कम्पनीहरूले यस्तो चिप खरिद गर्न ठूलो चासो देखाए पनि चिनियाँ सरकारले एनभिडियाप्रति चासो घटाएको बताइन्छ। उसले एच२० चिपको खरिदमा हतोत्साहित गर्दै घरेलु चिप उत्पादकहरूलाई प्राथमिकता दिइरहेको छ।
