एनभिडियालाई आफ्नो नयाँ पुस्ताको उच्च ब्यान्डविथ मेमोरी चिप आपूर्ति गर्न छलफलमा सामसङ इलेक्ट्रोनिक्स

काठमाडौं ।

दक्षिण कोरियाली चिप निर्माता सामसङ इलेक्ट्रोनिक्सले एनभिडियालाई आफ्नो नयाँ पुस्ताको उच्च ब्यान्डविथ मेमोरी (एचबीएम४) चिप आपूर्ति गर्न छलफल गरिरहेको बताएको छ। सामसङ हाल कृत्रिम बुद्धिमत्ता (एआई) चिप प्रतिस्पर्धामा प्रतिस्पर्धीहरूलाई पछ्याउन प्रयासरत छ।

सामसङले नयाँ चिप आगामी वर्ष बजारमा ल्याउने योजना बनाएको छ, तर एआई चिपसेटको महत्वपूर्ण घटक मानिएको यो नयाँ एचबीएम चिप कहिले पठाउने हो भन्ने जानकारी दिएको छैन।

स्थानीय प्रतिस्पर्धी एसके हाइनिक्स, जुन अहिले एनभिडियाको शीर्ष एचबीएम चिप आपूर्तिकर्ता हो,ले बुधबार आफ्नो नवीनतम एचबीएम४ चिपको ढुवानी चौथो त्रैमासिकदेखि सुरु गर्ने र आगामी वर्ष बिक्री विस्तार गर्ने लक्ष्य राखेको जनाएको थियो।

एनभिडियाले सामसङसँगको सहकार्यबारे जारी विज्ञप्तामा दुवै कम्पनी “एचबीएम३ई र एचबीएम४ का लागि प्रमुख आपूर्ति सहकार्य” मा छन्, तर थप विवरण दिएको छैन।

अर्को सम्झौताअनुसार, सामसङले ५० हजार उच्च-स्तरीय एनभिडिया चिप खरिद गर्नेछ, जसको प्रयोग एआई-सक्षम सेमीकन्डक्टर कारखाना निर्माणमा हुनेछ। यसले चिप उत्पादनको गति र कार्यक्षमता सुधार गर्ने लक्ष्य राखेको छ।

यी घोषणापछि सामसङको शेयर मूल्य अधिकतम ४.३२ प्रतिशतले बढ्यो।
बिहीबार एनभिडियाका सीईओ जेनसन हुआङको कोरिया भ्रमणका क्रममा, सामसङ अध्यक्ष जे वाई. ली र हुआङले फ्राइड चिकन र बियरका बीच भेट गरेका थिए। लिले एनभिडियालाई प्रमुख ग्राहक र रणनीतिक साझेदारका रूपमा उल्लेख गर्दै दुई दशकभन्दा बढीको सहकार्यलाई जोड दिएका थिए।

केबी सेक्युरिटीजका अनुसन्धान प्रमुख जेफ किमका अनुसार एचबीएम४ चिपलाई अझै केही परीक्षण आवश्यक पर्न सक्छ, तर सामसङको उत्पादन क्षमताका कारण उसलाई अनुकूल स्थितिमा देखिएको छ।

“यदि सामसङले एनभिडियालाई एचबीएम४ चिप आपूर्ति गर्न सफल भयो भने, उसले अघिल्ला एचबीएम श्रृंखलाबाट हासिल गर्न नसकेको ठूलो बजार हिस्सा सुनिश्चित गर्न सक्छ,” किमले भने।

एआई-आधारित मेमोरी चिपको माग बढ्दाबढ्दै पनि सामसङ यसको फाइदा लिन ढिलो भएको कारण गत वर्ष उसको आम्दानी कमजोर रह्यो र चिप विभागमा पुनर्संरचना गरिएको थियो। तर पछिल्लो त्रैमासिकमा परम्परागत मेमोरी चिपको मागले आम्दानी सुधारिएको छ।

यसै हप्तामा सामसङले आफ्नो हालको पुस्ताको एचबीएम३ई चिप “सबै सम्बन्धित ग्राहकहरू” लाई बिक्री गरिरहेको जनाएको छ, जसले उसले प्रतिस्पर्धीहरूसँगै एनभिडियालाई नवीनतम १२-लेयर एचबीएम३ई चिप आपूर्ति गर्न सुरु गरेको संकेत गर्छ।