सामसङ ग्यालेक्सी एआईले अब २२ भाषाहरूलाई समर्थन गर्ने

काठमाडौं ।

सन् २०२४ को सुरुवातमा लन्च भएदेखि सामसङको ग्यालेक्सी एआईले धेरै भन्दा धेरै भाषाहरूको लागि समर्थन थप्दै आएको छ। अप्रिल २०२४ मा समर्थित भाषाहरूको कुल संख्या १६ पुगेको थियो भने त्यसपछि त्यस वर्षको डिसेम्बरमा समर्थित भाषाहरूको कुल संख्या २० पुगेको थियो।

ग्यालेक्सी एआईले अब फिलिपिनो र गुजराती गरी दुई नयाँ भाषाहरू थप्ने भएको छ। यी भाषाहरू सेटिङ्स एपमा भाषा प्याकको रूपमा डाउनलोडको लागि उपलब्ध हुनेछन्। फिलिपिनो भाषा अनुमानित ८७ मिलियन मानिसहरूले बोल्ने बताइएको छ भने लगभग ६२.५ मिलियन मानिसहरूले गुजराती बोल्ने जनाइएको छ।

ग्यालेक्सी एआईको लागि फिलिपिनो र गुजराती भाषाहरू इन्डोनेसिया र भारतमा रहेको सामसङ अनुसन्धान केन्द्रहरूसँगको सहकार्यमा विकसित गरिएको हो। यी दुई नयाँ भाषाहरूको थपहरूसँगै ग्यालेक्सी एआईले अब २२ फरक भाषाहरूलाई समर्थन गर्दछ, जुन विश्वव्यापी जनसंख्याको लगभग ७४ प्रतिशत वा ५.९ अर्ब मानिसहरूले बोल्ने उल्लेख गरिएको छ।

ग्यालेक्सी एस२५ का ७० प्रतिशत भन्दा बढी मालिकहरूले नियमित रूपमा ग्यालेक्सी एआई र गुगल जेमिनी सँग संलग्न हुने गरेका छन् र ४७ प्रतिशत आफ्नो दैनिक जीवनमा एआईमा निकै भर पर्ने गरेको सामसङले बताएको छ। सन् २०२४ मा २० करोडको कोसेढुङ्गा पार गरेपछि कम्पनीले यस वर्षको अन्त्यसम्ममा ४० करोडभन्दा बढी डिभाइसहरूमा ग्यालेक्सी एआई ल्याउने बाटोमा रहेको विश्वास गरिएको जीएसएमएरिनाले रिपोर्ट गरेको छ।