आईबीएमले हासिल गर्‍यो एएमडी चिपमा क्वान्टम कम्प्युटिङ एल्गोरिदम चलाउने सफलता

काठमाडौं ।

अमेरिकी प्रविधि कम्पनी आईबीएमले एडभान्स्ड माइक्रो डिभाइसेस (एएमडी) का साधारण रूपमा उपलब्ध चिपहरूमा क्वान्टम कम्प्युटिङको प्रमुख त्रुटि–सुधार एल्गोरिदम सफलतापूर्वक चलाउन सफल भएको जनाएको छ। यो उपलब्धि अत्याधुनिक क्वान्टम कम्प्युटरलाई व्यावसायिक रूपमा प्रयोगमा ल्याउने दिशामा महत्वपूर्ण कदम मानिएको छ।

आईबीएम हाल क्वान्टम प्रविधिमा माइक्रोसफ्ट र गुगल (अल्फाबेट) सँग प्रतिस्पर्धामा छ। गुगलले यसै हप्ता नयाँ एल्गोरिदममा सफलता प्राप्त गरेको घोषणा गरेको थियो।

क्वान्टम कम्प्युटरहरूले क्युबिट नामका तत्वहरू प्रयोग गर्छन्, जसले साधारण कम्प्युटरले हजारौं वर्ष लाग्ने समस्या केही समयमै समाधान गर्न सक्छ — जस्तै अणुहरूको जटिल प्रतिक्रिया प्रक्रियाको अध्ययन। तर क्युबिटहरू त्रुटिप्रवण हुने भएकाले ती त्रुटिहरूले कम्प्युटिङ कार्यलाई अव्यवस्थित बनाउन सक्छन्।

आईबीएमले यस वर्ष जुन महिनामा यस्तो त्रुटि सम्बोधन गर्नसक्ने एल्गोरिदम विकास गरेको घोषणा गरेको थियो। अब कम्पनीले रॉयटर्सले हेरेको अनुसन्धानपत्रमा देखाएको छ कि उक्त एल्गोरिदम एएमडीले निर्माण गरेको फील्ड प्रोग्रामेबल गेट एरे (एफपीजीए) नामक चिपमा रियल टाइममा सञ्चालन गर्न सकिन्छ।

स्पेस डटकमका अनुसार आईबीएम अनुसन्धान निर्देशक जे ग्याम्बेटा का अनुसार यस सफलताले एल्गोरिदम व्यावहारिक रूपमा पनि काम गर्छ भन्ने प्रमाणित गरेको छ र यो “अत्यधिक महँगो नभएको” चिपमा सञ्चालन गर्न सकिने देखाएको छ।

उनले भने, “यसलाई कार्यान्वयन गर्नु र आवश्यक भन्दा १० गुणा छिटो काम गर्न सक्ने देखाउनु ठूलो उपलब्धि हो।”

आईबीएमले २०२९ सम्म ‘स्टारलिङ’ नामक क्वान्टम कम्प्युटर निर्माण गर्ने बहुवर्षीय योजना अघि सारेको छ। कम्पनीका अनुसार यो एल्गोरिदमसम्बन्धी काम तोकिएको समयभन्दा एक वर्ष अघि पूरा गरिएको हो।

शुक्रबारको बजार बन्द हुँदा आईबीएमको सेयर मूल्य ७.८८% ले बढेर ३९७.४६ डलरमा, र एएमडीको सेयर मूल्य ७.६३% ले बढेर २५२.९२ डलरमा पुगेको थियो।