एएमडीले ओपनएआईसँग एआई चिप आपूर्तिको बहुवर्षीय सम्झौता गरेपछि सेयर मूल्य ३४ प्रतिशतले बढ्यो

काठमाडौं ।

एएमडीले कृत्रिम बुद्धिमत्ता चिप्स आपूर्तिका लागि ओपनएआईसँग बहुवर्षीय सम्झौता गरेको छ जसबाट कम्पनीले वार्षिक रूपमा दर्जनौँ अर्ब अमेरिकी डलर आम्दानी गर्ने अपेक्षा गरिएको छ। यस सम्झौताअनुसार ओपनएआईले एएमडीको करिब १० प्रतिशत हिस्सा किन्ने विकल्प पनि पाउनेछ।

सोमबार एएमडीको सेयर मूल्य ३४ प्रतिशतभन्दा बढीले उक्लिँदै नौ वर्षयताकै सबैभन्दा ठूलो एकदिने वृद्धि भएको छ। यसले कम्पनीको बजार मूल्यमा करिब ८० अर्ब डलर थपिएको छ।

यो सम्झौता एआई क्षेत्रमा बढ्दो लगानी प्रतिबद्धताको पछिल्लो उदाहरण बनेको छ, जसले ओपनएआई र सम्पूर्ण एआई उद्योगमा कम्प्युटिङ शक्तिको तीव्र माग देखाउँछ। कम्पनीहरू अहिले मानवस्तर बराबर वा त्यसभन्दा उन्नत एआई प्रविधि विकासतर्फ दौडिरहेका छन्।

एएमडीका कार्यकारी उपाध्यक्ष फोरेस्ट नोरोडले रोयटर्ससँग भने, “यो सम्झौता एएमडीका लागि मात्र होइन, सम्पूर्ण उद्योगका लागि रूपान्तरणकारी सावित हुनेछ।”

एआई बजारमा ठूलो विश्वासको संकेत

यो सम्झौताले ओपनएआईलाई एएमडीसँग घनिष्ठ रूपमा जोड्नेछ। एएमडीलाई एनभिडियाको प्रमुख प्रतिस्पर्धी मानिन्छ, जसले हालै ओपनएआईमा ठूला लगानी गर्ने सहमति जनाएको थियो।

विश्लेषकहरूले यो सम्झौताले एएमडीका एआई चिप र सफ्टवेयरमा ठूलो विश्वास प्रकट गरेको बताए पनि यसले एनभिडियाको बजार वर्चस्व घटाउने सम्भावना कम रहेको उल्लेख गरेका छन् किनकि एनभिडियाले आफ्नो उत्पादन गरिएका सबै एआई चिप बेच्न सक्षम छ।

सम्झौताअनुसार एएमडीले सन् २०२६ को दोस्रो छिमाहीदेखि सुरु हुनेगरी सयौँ हजार एआई चिप्स (जीपीयू) उपलब्ध गराउनेछ, जसको कुल क्षमता छ गिगावाट बराबर हुनेछ। यो ऊर्जाको मात्रा करिब ५० लाख अमेरिकी घरधुरीको आवश्यकतासँग बराबर छ वा हुवर ड्यामको उत्पादन क्षमताको तीन गुणा हो।

एएमडीले भनेको छ कि ओपनएआईले आगामी वर्षदेखि आफ्नो नयाँ एमआई४५० सिरिजका चिपमा आधारित एक गिगावाट क्षमताको डाटा सुविधा निर्माण गर्नेछ, त्यसपछि एएमडीले आम्दानी मान्यता दिन सुरु गर्नेछ।
कम्पनीका अधिकारीहरूले यो सम्झौताबाट वार्षिक रूपमा दर्जनौँ अर्ब डलर आम्दानी हुने अपेक्षा गरेका छन्। सम्झौताका प्रभावहरूका कारण एएमडीले चार वर्षभित्र ओपनएआई र अन्य ग्राहकबाट १०० अर्ब डलरभन्दा बढी आम्दानी गर्ने अनुमान गरिएको छ।

एलएसईजीका तथ्यांकअनुसार एएमडीको यस वर्षको आम्दानी ३२.७८ अर्ब डलर रहनेछ भने एनभिडियाको हालको आर्थिक वर्षको आम्दानी २०६.२६ अर्ब डलर हुने अनुमान छ।

कन्करेन्ट एसेट म्यानेजमेनट की प्रमुख लगानी रणनीतिकार लिया बेनेटले भनिन्, “एएमडी लामो समयदेखि एनभिडियाभन्दा पछि परेको थियो। यो सम्झौताले यसको प्रविधि अब प्रमाणित भएको देखाउँछ।” एनभिडियाको सेयर मूल्य भने सोही दिन १ प्रतिशतभन्दा बढीले घटेको थियो।

ओपनएआईका सीईओ साम अल्टम्यानले भने, एएमडीसँगको सम्झौताले कम्पनीलाई आफ्नो एआई पूर्वाधार विस्तार गर्न सहयोग गर्नेछ। तर यो विशाल सम्झौताका लागि ओपनएआईले स्रोत कहाँबाट जुटाउने भन्ने कुरा स्पष्ट छैन।

मिडिया रिपोर्टअनुसार ५०० अर्ब अमेरिकी डलर मूल्याङ्कन भएको ओपनएआईले २०२५ को पहिलो छ महिनामा करिब ४.३ अर्ब डलर आम्दानी गरेको थियो र २.५ अर्ब डलर नगद खर्च गरेको थियो।