Technology Khabar २५ भाद्र २०८२, बुधबार
काठमाडौं ।
नेबियस ग्रुपले सोमबार माइक्रोसफ्टलाई जीपीयू इन्फ्रास्ट्रक्चर क्षमता उपलब्ध गराउने १७.४ अर्ब डलरको सम्झौता गरेको जनाएको छ। यो सम्झौता पाँच वर्षका लागि हुने र समाचारपछि कम्पनीको सेयर मूल्य ४७ प्रतिशतभन्दा बढी बढेको छ।
सम्झौताले उच्च क्षमताको एआई कम्प्युटिङको बढ्दो मागलाई देखाउँछ, किनकि कम्पनीहरूले आफ्नो एआई इन्फ्रास्ट्रक्चरलाई मजबुत बनाउन ठूलो लगानी गरिरहेका छन्।
यस सम्झौताअन्तर्गत माइक्रोसफ्टले थप सेवा क्षमताहरू पनि लिनसक्ने र कुल सम्झौता मूल्य करिब १९.४ अर्ब डलर पुग्ने सम्भावना रहेको छ।
नेबियसको मुख्य व्यवसायमा एनभिडियाले ग्राफिक प्रोसेसिङ युनिट र एआई क्लाउड सेवा उपलब्ध गराउने कार्य पर्दछ। कम्पनीले एआई विकासकर्ताहरूलाई आफ्नो क्लाउड सफ्टवेयर आर्किटेक्चर र आफ्नै डिजाइन गरेको हार्डवेयरको मद्दतले कम्प्युटिङ, भण्डारण, व्यवस्थापन सेवा र उपकरणहरू उपलब्ध गराउँछ।
नेबियसले यस वर्षको अन्त्यदेखि न्यू जर्सीको भिनल्याण्डमा रहेको आफ्नो नयाँ डाटा सेन्टरमार्फत माइक्रोसफ्टलाई समर्पित जीपीयू इन्फ्रास्ट्रक्चर क्षमता उपलब्ध गराउनेछ।
“यो सम्झौताले आर्थिक हिसाबले फाइदा मात्र गर्ने छैन, तर यसले २०२६ पछि हाम्रो एआई क्लाउड व्यवसायलाई अझै तीव्र गतिमा बढाउन मद्दत गर्नेछ,” नेबियसका प्रमुख कार्यकारी अधिकृत अर्काडी भोलोजले बताएका रोयटर्सले उल्लेख गरेको छ।
माइक्रोसफ्ट हाल नेबियसको प्रतिस्पर्धी कोरवीभको सबैभन्दा ठूलो ग्राहक हो। यसै वर्ष कोरवीभले हाइपरस्केलरबाट आफ्नो सम्झौता रद्द भएको भन्ने समाचारलाई अस्वीकार गरेको थियो।
एम्स्टर्डमस्थित नेबियस ग्रुप रुसको प्रविधि कम्पनी यान्डेक्सको सम्पत्ति विभाजन सम्झौताबाट उदाएको हो।
प्रकाशित: २५ भाद्र २०८२, बुधबार
