सामसङ र एसके हाइनिक्सलाई चीनमा चिप उत्पादन गर्न अझ कठिन बनाउँदै अमेरिका

काठमाडौं ।

अमेरिकाले दक्षिण कोरियाली चिप निर्माता कम्पनीहरू सामसङ र एसके हाइनिक्सलाई चीनमा चिप उत्पादन गर्न अझ कठिन बनाउने निर्णय गरेको छ। अमेरिकी संघीय राजपत्रअनुसार यी कम्पनीहरूलाई चीनमा अमेरिकी अर्धचालक उत्पादन उपकरण प्राप्त गर्न दिइएको अनुमति खारेज गरिएको छ।

अमेरिकी वाणिज्य विभागले सन् २०२२ मा चीनलाई अमेरिकी सेमिकण्डक्टर उपकरण बिक्रीमा लगाइएका व्यापक प्रतिबन्धहरूबाट यी कम्पनीलाई छुट दिएको थियो। अब कम्पनीहरूले चीनका लागि उपकरण खरिद गर्न अनुमति पत्र लिनुपर्नेछ। उक्त फाइलिङमा इण्टेललाई पनि चीनका लागि दिइएको अनुमति खारेज भएको उल्लेख छ।

तर, इण्टेलले यस वर्ष चीनको डालियान इकाई बिक्री गर्ने सम्झौता पूरा गरिसकेको छ।

रोयटर्सका अनुसार यी खारेजीहरू १२० दिनमा लागू हुने जनाइएको छ। वाणिज्य विभागले जारी गरेको विज्ञप्तिमा चीनमा कम्पनीहरूले सञ्चालन गरिरहेका कारखानाका लागि अनुमति दिने तर क्षमता विस्तार वा प्रविधि उन्नतिका लागि अनुमति नदिने उल्लेख छ।

एसके हाइनिक्सले विज्ञप्ति जारी गर्दै भनेको छ, “हामी कोरियाली र अमेरिकी दुवै सरकारसँग नजिक सम्पर्कमा रहनेछौं र व्यवसायमा पर्ने असर न्यून बनाउन आवश्यक कदम चाल्नेछौं।” सामसङले भने यसबारे कुनै प्रतिक्रिया दिएको छैन।

दक्षिण कोरियाको उद्योग मन्त्रालयले चीनमा आफ्ना अर्धचालक कम्पनीहरूको स्थिर सञ्चालन विश्वव्यापी आपूर्ति श्रृंखलाको स्थायित्वका लागि महत्वपूर्ण भएको कुरा अमेरिकी वाणिज्य विभागलाई स्पष्ट पारेको जनाएको छ।

मन्त्रालयका अनुसार, सिओलले अमेरिकी पक्षसँग निरन्तर छलफल गर्नेछ। चीनको वाणिज्य मन्त्रालयका प्रवक्ताले अमेरिकाको यो कदमको विरोध गर्दै आवश्यक कदम चालेर कम्पनीहरूको वैध अधिकार र हितको रक्षा गर्ने बताएका छन्।

यस परिवर्तनले अमेरिकी उपकरण निर्माताहरू केएलए, ल्याम रिसर्च र एप्लाइड मटेरियल्सको चीनतर्फ हुने बिक्री घटाउने सम्भावना छ। यी कम्पनीहरूले तत्काल प्रतिक्रिया दिएका छैनन्। ल्याम रिसर्चको सेयर ४.४ प्रतिशतले, एप्लाइड म्याटेरियल्सको २.९ प्रतिशतले र केएलएको सेयर २.८ प्रतिशतले घटेको छ।

अमेरिकी वाणिज्य विभागले जूनमा अनुमति खारेज गर्ने संकेत दिएको थियो। जुलाईमा दक्षिण कोरिया र अमेरिकाबीच शुल्क सम्बन्धी सम्झौता भएको घोषणा भए पनि राष्ट्रपति ली जे म्युङ र अमेरिकी राष्ट्रपति डोनाल्ड ट्रम्पबीच हालैको शिखर वार्तामा लिखित सम्झौता अन्तिम हुन सकेको छैन।

हाल अमेरिका र चीन शुल्क युद्धविरुद्ध अस्थायी सम्झौतामा छन्, जसअनुसार नोभेम्बरसम्म चीनबाट अमेरिकामा आउने सामानमा ३० प्रतिशत र अमेरिकाबाट चीन जाने सामानमा १० प्रतिशत शुल्क कायम छ। यस व्यापार विवादले दुर्लभ धातुदेखि अमेरिकी सोयाबिन खरिदसम्म असर पारेको छ।

विश्लेषक क्रिस मिलरले भनेका छन्, “यो कदमले चीनमा कारखाना भएका कोरियाली चिप निर्माताहरूलाई उन्नत चिप उत्पादन गर्न अझ गाह्रो बनाउनेछ।” यसबाट घरेलु चिनियाँ उपकरण निर्माताहरूलाई लाभ पुग्ने सम्भावना छ। साथै, यो कदमले अमेरिकी चिप कम्पनी माइक्रोनलाई पनि मद्दत गर्न सक्छ, जसले स्मृति चिप बजारमा सामसङ र एसके हाइनिक्ससँग प्रतिस्पर्धा गर्दै आएको छ।