मेटाले स्वीकृति नलिई बनायो टेलर स्विफ्टलगायत कलाकारहरुको नाम र तस्बिरसहितको च्याटबोट

काठमाडौं ।

मेटाले टेलर स्विफ्ट, स्कारलेट जोहानसन, एन ह्याथवे र सेलेना गोमेजलगायत चर्चित कलाकारहरूको नाम र तस्बिर प्रयोग गरी उनीहरूको अनुमति बिना फ्लर्ट गर्ने खालका सामाजिक सञ्जाल च्याटबोट बनाएको छ।

यीमध्ये धेरै च्याटबोट प्रयोगकर्ताले मेटाको च्याटबोट बनाउने उपकरणमार्फत तयार गरेका भए पनि, कम्तीमा तीन वटा मेटाकै कर्मचारीले बनाएको तथ्य रोयटर्सले फेला पारेको छ। त्यसमा दुई वटा टेलर स्विफ्टको “प्यारोडी” च्याटबोटसमेत समावेश छन्।

रोयटर्सले मेटाले १६ वर्षे बाल कलाकार वाकर स्कोबेललगायत बाल कलाकारका च्याटबोट पनि प्रयोगकर्ताले बनाउन दिने गरेको पत्ता लगाएको छ। परीक्षणका क्रममा जब उक्त च्याटबोटलाई समुद्र किनाराको फोटो मागियो, उसले वास्तविक जस्तो देखिने शर्टलेस तस्बिर बनाएर “राम्रो लाग्छ है?” भन्ने प्रतिक्रिया दिएको थियो।

यी भर्चुअल सेलिब्रिटीहरू फेसबुक, इन्स्टाग्राम र ह्वाट्सएपमा सार्वजनिक रूपमा उपलब्ध गराइएका छन्। रोयटर्सले गरेको परीक्षणमा च्याटबोटहरूले आफू नै वास्तविक कलाकार भएको दावी गर्ने र प्रयोगकर्तासँग भेट्ने प्रस्ताव गर्ने जस्ता यौनजन्य कुरा गर्ने गरेको पाइएको छ।

केही अवस्थामा त च्याटबोटहरूले भर्चुअल नग्न तस्बिर र अन्तर्वस्त्रमा खिचिएका जस्तो देखिने तस्बिर समेत सिर्जना गरेका थिए।

मेटाका प्रवक्ता एन्डी स्टोनले यस्तो सामग्री नबन्ने व्यवस्था भए पनि कम्पनीको नीति लागू नहुँदा यस्तो भएको बताएका छन्। उनका अनुसार सार्वजनिक व्यक्तित्वसँग सम्बन्धित तस्बिर बनाउन अनुमति भए पनि नग्नता वा यौनजन्य सामग्री बनाउन प्रतिबन्ध छ।

मेटाले करिब एक दर्जन च्याटबोट—प्यारोडी र लेबल नगरिएका दुवै—समाचार प्रकाशन हुनु अघि हटाएको छ।

स्ट्यानफोर्ड विश्वविद्यालयका कानुन विज्ञ मार्क लेम्लीले क्यालिफोर्नियाको ‘राइट अफ पब्लिसिटी’ कानुनअनुसार कसैको नाम वा तस्बिर व्यावसायिक लाभका लागि प्रयोग गर्न नपाइने हुँदा मेटाले बनाएको सेलिब्रिटी च्याटबोट कानुनी सवालमा पर्न सक्ने बताएका छन्।

एन ह्याथवेको तस्बिरलाई “सेक्सी भिक्टोरियाज सिक्रेट मोडल” को रूपमा प्रयोग गरिएको सामग्रीबारे सोध्दा उनको प्रवक्ताले यसबारे जानकारी रहेको र प्रतिक्रिया दिने तयारीमा रहेको बताएका छन्। टेलर स्विफ्ट, जोहानसन र गोमेजका प्रतिनिधिहरूले भने कुनै प्रतिक्रिया दिएका छैनन्।

मेटाका प्रतिस्पर्धी प्लेटफर्महरूले पनि यस्तै सामग्री बनाउने गरेको रोयटर्सले फेला पारेको छ। तर आफ्नै सामाजिक सञ्जालमा यस्ता च्याटबोट उपलब्ध गराएकोमा मेटा विशेष आलोचनामा परेको छ।

यसअघि पनि बालबालिकासँग रोमान्टिक वा संवेदनशील कुरा गर्न सक्ने खालका नियम भएको खुलासा भएपछि अमेरिकी सिनेटले अनुसन्धान थालेको थियो। मेटाले त्यो नीतिगत सामग्री गल्तीले बनेको भन्दै अहिले परिमार्जन भइरहेको जनाएको छ।

हालै ७६ वर्षीय एक अमेरिकी वृद्ध मेटाको च्याटबोटसँग भेट्न निस्कँदा दुर्घटनामा परेर मृत्यु भएको घटना पनि सार्वजनिक भएको छ। उक्त च्याटबोट मेटाले पूर्वमा सेलेब्रिटी इन्फ्लुएन्सर केन्डल जेन्नरसँग बनाएको पात्रको भेरियन्ट भएको बताइएको छ।

मेटाकै एक उत्पादन प्रमुखले टेलर स्विफ्ट र लेविस ह्यामिल्टनको च्याटबोटसहित विभिन्न भूमिकामा प्रयोग हुने च्याटबोट बनाएका थिए। ती च्याटबोटहरूसँग १ करोडभन्दा बढी अन्तरक्रिया भएको तथ्य रोयटर्सले पत्ता लगाएको छ। ती च्याटबोटहरू यस महिनाको परीक्षणअघि हटाइएका छन्।

सेलिब्रिटीहरूको छविलाई प्रयोग गरेर बनाइएका डिजिटल पात्रहरूसँग प्रयोगकर्ताले भावनात्मक सम्बन्ध बनाउन सक्ने र यसले कलाकारहरूको सुरक्षामा खतरा पुर्‍याउन सक्ने भन्दै अमेरिकाको कलाकार संगठन एसएजी आफ्ट्राले संघीय स्तरमै कानुन आवश्यक रहेको जनाएको छ।