एप्पलले आईफोनको तीनओटा प्रमुख रिडिजाइनमा काम गरिरहेको छः गर्मन

काठमाडौं ।

एप्पलले अन्ततः आईफोन लाइनअपमा केही प्रमुख डिजाइन परिवर्तनहरू ल्याउने ब्लूमबर्गका मार्क गर्मनले खुलासा गरेका छन्। आईफोन १२ पछि आईफोन लगभग उस्तै देखिदै आएको छ र यो अवस्थामा चाँडै परिवर्तन हुन सक्ने सम्भावना रहेको उल्लेख गरिएको छ।

एप्पलले अर्को महिना लन्च हुने अपेक्षा गरिएको आईफोन १७ एयरबाट सुरु गर्दै आगामी तीन वर्षको लागि प्रमुख आईफोन पुनः डिजाइनको योजना बनाएको पावर अन न्यूजलेटरमा गर्मनले रिपोर्ट गरेका छन्। साथै यस पटक स्लिम एयर मोडेलले आईफोन १६ प्लस भेरियन्टलाई प्रतिस्थापन गर्ने हल्ला रहेको छ।

आईफोन १७ एयरले एउटा रियर क्यामरा प्रदान गर्ने र एप्पलको पहिलो इन–हाउस मोडेम फिचर गर्ने भनिएको छ। यसले सानो ब्याट्री प्रदान गर्नेछ भने कुनै भौतिक सिम कार्ड स्लट नहुने जनाइएको छ। आईफोन १७ झट्ट हेर्दा आईफोन १६ जस्तै देखिनेछ भने आईफोन १७ प्रो र १७ प्रो म्याक्समा पुनः डिजाइन गरिएको रियर क्यामरा मोड्युल हुनेछ।

त्यसैगरी एप्पलले सन् २०२६ मा फोल्डेबल आईफोन लन्च गर्ने गर्मनले उल्लेख गरेका छन्। साथै भी६८ कोडनेम रहेको यस डिभाइसमा जम्मा चार ओटा क्यामराहरू (दुई पछाडि, एउटा बाहिर र एउटा भित्र) हुनेछन्।

कालो र सेतो फिनिशका प्रोटोटाइपहरू परीक्षण गरिँदैछ भने फोल्डेबल सेट एप्पलको कस्टम सी२ मोडेममा चल्ने जनाइएको छ। भित्री डिस्प्लेको लागि, एप्पलले इन–सेल टच प्यानल प्रयोग गरिरहेको बताइएको छ र जसले टच एक्युरेसी सुधार गर्दै क्रिज कम गर्न मद्दत गर्नेछ।

अन्ततः, सन् २०२७ मा, एप्पलले आईफोनको २० औं वार्षिकोत्सवको सम्झनामा पूर्ण रूपमा नयाँ कर्भ–ग्लास डिजाइनको साथ आईफोन २० लन्च गर्ने रिपोर्ट गरिएको छ। यो एक प्रमुख पुनः डिजाइन हुने भनिएको छ र अहिले प्रयोग गरिरहेका भन्दा धेरै फरक हुने जीएसएमएरिनाले रिपोर्ट गरेको छ।