Technology Khabar ९ भाद्र २०८२, सोमबार
काठमाडौं ।
सोसल नेटवर्किङ स्टार्टअप ब्लुस्काइले नयाँ उमेर प्रमाणीकरण कानुन पालना गर्नुको सट्टा आफ्नो सेवा मिसिसिपी राज्यमा बन्द गर्ने निर्णय गरेको छ। कम्पनीले शुक्रबार प्रकाशित ब्लग पोस्टमा लेख्दै सानो टिम भएकाले यस प्रकारको कानुन कार्यान्वयन गर्न आवश्यक ठूलो प्राविधिक परिवर्तनका लागि स्रोत नभएको जनाएको छ। साथै उक्त कानुनको व्यापक दायरा र गोपनीयतासम्बन्धी असरबारे पनि चिन्ता व्यक्त गरिएको छ।
मिसिसिपीको एचबी ११२६ अनुसार ब्लुस्काइ जस्ता सोसल नेटवर्क प्रयोग गर्नुअघि सबै प्रयोगकर्ताले उमेर प्रमाणीकरण गर्नुपर्ने हुन्छ। बिहीबार अमेरिकाको सर्वोच्च अदालतले कानुनी चुनौतीबारेको प्रक्रिया चलिरहेकाले यो कानुन तत्काल लागू हुन नदिने आपत्कालीन अपील रोकेको थियो। त्यसपछि ब्लुस्काइलाई पालना गर्ने वा नगर्नेबारे निर्णय लिनुपर्ने भएको हो।
यस कानुनले प्रयोगकर्ताले उमेर-प्रतिबन्धित सामग्री मात्र होइन, सेवा प्रयोग गर्नुअघि नै उमेर प्रमाणीकरण गर्नुपर्ने व्यवस्था गरेको छ। यसले ब्लुस्काइलाई सबै प्रयोगकर्ताको उमेर प्रमाणित गर्नुपर्ने र १८ वर्ष मुनिका लागि अभिभावकको सहमति लिनुपर्ने हुन्छ। पालना नगरेमा प्रति प्रयोगकर्ता अधिकतम १० हजार डलरसम्मको जरिवाना तिर्नु पर्ने प्रावधान छ।
ब्लुस्काइले कानुनले बालबालिकाको सुरक्षाभन्दा पर गई अभिव्यक्ति स्वतन्त्रतामा अवरोध पुर्याउने र साना प्लेटफर्म तथा नयाँ प्रविधिहरूलाई असर गर्ने चेतावनी दिएको छ।
पालना गर्न कम्पनीले सबै प्रयोगकर्ताको संवेदनशील विवरण संकलन र भण्डारण गर्नुपर्ने हुन्छ, साथै नाबालक प्रयोगकर्ताको विस्तृत ट्र्याकिङ गर्नुपर्ने हुन्छ। यस प्रकारको प्रक्रिया बेलायतको अनलाइन सेफ्टी एक्ट (ओएसए) जस्तो अन्य कानुनभन्दा फरक रहेको कम्पनीले जनाएको छ, जसले केवल निश्चित सामग्री वा सुविधा प्रयोग गर्दा मात्र उमेर प्रमाणीकरण माग्छ।
मिसिसिपीको कानुनअनुसार व्यक्तिगत र संवेदनशील विवरण उपलब्ध नगरिएसम्म कुनै पनि प्रयोगकर्ताले साइट प्रयोग गर्न पाउने छैनन्।
“विशाल स्रोत भएका ठूला टेक कम्पनीहरूभन्दा हामी सानो टिम हौँ, जसले प्रयोगकर्तालाई नियन्त्रण दिने विकेन्द्रीकृत सोसल प्रविधि विकास गरिरहेका छौँ,” कम्पनीको ब्लगमा भनिएको छ।
“उमेर प्रमाणीकरण प्रणालीका लागि ठूलो संरचना, विकासकर्ता समय, जटिल गोपनीयता सुरक्षा र निरन्तर निगरानी आवश्यक हुन्छ, जुन साना प्रदायकहरूलाई सजिलै थिच्न सक्छ। यसले ठूला टेक कम्पनीलाई अझ बलियो बनाउँछ र प्रयोगकर्तालाई फाइदा पुर्याउने नवप्रवर्तन तथा प्रतिस्पर्धालाई रोक्छ,” ब्लगमा उल्लेख छ।
मिसिसिपीबाहिरका केही प्रयोगकर्ताले पनि सेवा प्रयोग गर्दा समस्या आएको बताएका छन्, किनभने उनीहरूको मोबाइल प्रदायकले ट्राफिक मिसिसिपीका सर्वरमार्फत पठाएको थियो। यसबारे सीटीओ पल फ्रेजीले शनिबार प्रतिक्रिया दिँदै स्थान पहिचान प्रणाली सुधार्ने अद्यावधिकमा काम भइरहेको बताएका छन्।
ब्लग पोस्टमा यो निर्णय ब्लुस्काइको एटी प्रोटोकलमा आधारित आधिकारिक एपमा मात्र लागू हुने उल्लेख छ। अन्य एपहरूले फरक निर्णय लिन सक्नेछन्।
प्रकाशित: ९ भाद्र २०८२, सोमबार
