ओपनएआईले यसै वर्ष भारतमा पहिलो कार्यालय खोल्ने

काठमाडौं ।

च्याटजीपीटीकी मातृ कम्पनी ओपनएआईले यस वर्षकै अन्त्यतिर नयाँदिल्लीमा आफ्नो पहिलो भारत कार्यालय खोल्ने भएको छ। प्रयोगकर्ताको संख्याका आधारमा दोस्रो ठूलो बजार बनेको भारतमा ओपनएआईले आफ्नो उपस्थितिलाई अझ गहिर्याउने तयारी गरेको हो।

माइक्रोसफ्टको समर्थन पाएको ओपनएआईले भारतमा कानुनी इकाइ दर्ता गरिसकेको छ र स्थानीय टोली भर्ना गर्ने काम सुरु गरेको कम्पनीले शुक्रबार रोयटर्ससँग साझा गरेको विज्ञप्तिमा जनाएको छ।

भारत च्याटजीपीटीका लागि महत्वपूर्ण बजार मानिएको छ। विश्वकै सबैभन्दा बढी जनसंख्या भएको देशमा झण्डै एक अर्ब इन्टरनेट प्रयोगकर्तालाई लक्ष्य गर्दै कम्पनीले यसै सातादेखि मासिक ४.६० डलरमा उपलब्ध हुने सबैभन्दा सस्तो योजना सार्वजनिक गरेको छ।

तर भारतमा ओपनएआई कानुनी चुनौतीको सामना गरिरहेको छ। समाचार संस्था र पुस्तक प्रकाशकहरूले कम्पनीले आफ्नो सामग्री अनुमति बिना प्रयोग गरेर च्याटजीपीटीलाई तालिम दिएको आरोप लगाएका छन्। कम्पनीले भने कुनै गल्ती नगरेको दावी गरेको छ।

“भारतभर उन्नत एआई पहुँचयोग्य बनाउन र भारतका लागि भारतसँगै एआई निर्माण गर्ने हाम्रो प्रतिबद्धताको पहिलो कदमको रूपमा पहिलो कार्यालय खोल्नु र स्थानीय टोली बनाउन सुरु गर्नु महत्त्वपूर्ण छ,” ओपनएआईका प्रमुख कार्यकारी अधिकृत स्याम आल्टम्यानले विज्ञप्तिमा भनेका छन्।

भारतमा कम्पनीलाई गुगलको जेमिनी र एआई स्टार्टअप पर्प्लेक्सिटीजस्ता प्रतिस्पर्धीहरूसँग कडा प्रतिस्पर्धा छ। यी कम्पनीहरूले धेरै प्रयोगकर्तालाई लक्षित गर्दै आफ्ना उन्नत योजना निःशुल्क उपलब्ध गराइरहेका छन्। च्याटजीपीटीमा भारतका विद्यार्थी प्रयोगकर्ताको संख्या सबैभन्दा धेरै छ। साथै, साप्ताहिक सक्रिय प्रयोगकर्ताको संख्या विगत एक वर्षमा चौगुणा भएको नयाँ बजार तथ्यांक शुक्रबार ओपनएआईले सार्वजनिक गरेको छ।