थाइल्यान्डले विदेशी पर्यटकका लागि क्रिप्टोकरेन्सीबाट भाटमा रूपान्तरण गर्ने सुविधा दिने

काठमाडौं ।

थाइल्यान्डले विदेशी पर्यटकलाई स्थानीय स्तरमा भुक्तानी गर्नका लागि क्रिप्टोकरेन्सीलाई भाटमा रूपान्तरण गर्न दिने १८ महिनाको परीक्षण कार्यक्रम सुरु गर्ने भएको छ। अधिकारीहरूले सोमबार यसबारे जानकारी दिएका छन्। यो कदम देशको महत्त्वपूर्ण पर्यटन क्षेत्रलाई पुनर्जीवित गर्ने प्रयासअन्तर्गत लिइएको हो।

रूपान्तरणको सीमा ५ लाख ५० हजार बाट (१६ हजार ९४९ डलर) तोकिएको छ, जसले प्रणाली परीक्षण गर्न र सम्पत्ति शुद्धिकरण रोक्न सहयोग गर्नेछ।

अर्थ मन्त्रालयका स्थायी सचिव लावरन साङ्स्नितले पत्रकारलाई बताएअनुसार, यो सीमा परीक्षण अवधि सकिएपछि पुनरावलोकन गर्न सकिनेछ। दक्षिणपूर्वी एसियाको दोस्रो ठूलो अर्थतन्त्रमा विदेशी पर्यटक आगमन घट्दै गएको अवस्थामा यो पहल ल्याइएको हो।

रोयटर्सका अनुसार पर्यटकहरूले थाइल्यान्डमा आधारित क्रिप्टो एक्सचेन्ज प्लेटफर्ममार्फत रूपान्तरण गर्न सक्नेछन्। त्यसपछि रकम अनलाइन वालेट एप्लिकेशनमा सारिनेछ, जसबाट स्थानीय व्यवसायमा भुक्तानी गर्न सकिनेछ, अर्थमन्त्री पिचाई चुनहवाजिराले पत्रकारलाई जानकारी दिए।

“यो परियोजनाले पर्यटनलाई सहयोग गर्नेछ,” पिचाईले भने, “यसले सुरुवाती चरणमै पर्यटकको खर्च बढाउन मद्दत गर्न सक्छ।”
सोमबार थाइल्यान्डको राज्य योजनाका निकायले सन् २०२५ मा विदेशी पर्यटक आगमनको पूर्वानुमान १० प्रतिशतले घटाएर ३३ मिलियन पुर्‍याएको छ।

यो अनुमानित संख्या महामारीअघि सन् २०१९ को तुलनामा निकै कम हो। त्यतिबेला थाइल्यान्डले ३९.९ मिलियन विदेशी आगमन दर्ता गरेको थियो, जसबाट १.९१ ट्रिलियन बाट (५८.८६ अर्ब डलर) राजस्व आर्जन भएको थियो।