नेपाल टेलिकमको खुद नाफा चौथो त्रैमासिकमा ५७ दशमलब २१ प्रतिशतले घट्यो

काठमाडौं ।

सरकारी दूरसञ्चार कम्पनी नेपाल टेलिकमको खुद नाफा आ.व.२०८१/८२ को चौथो त्रैमासिकमा ५७ दशमलब २१ प्रतिशतले कमी भएको छ।

कम्पनीले आज सार्वजनिक गरेको चौथो त्रैमासिक वित्तीय विवरण अनुसार यस आ.व. को चौथो त्रैमासिकसम्म खुद मुनाफा २ अर्ब ६६ करोड ८१ लाख ९२ हजार रुपैयाँ रहेको छ।

उक्त रकम गत आ.व. को सोहि अवधिको खुद मुनाफा ६ अर्ब २३ करोड ५५ लाख २ हजारको तुलनामा ३ अर्ब ५६ करोड ७३ लाख ९ हजार (अर्थात् ५७.२१ प्रतिशत) रुपैयाँले कमी भएको देखिएको छ।

कम्पनीको आम्दानी घटेसँगै नाफामा समेत कमी देखिएको हो। नेपाल टेलिकमको यस आ.व.को चौथो त्रैमासिकसम्म कुल सञ्चालन आय रु. ३४ अर्ब ५३ करोड २४ लाख ४२ हजार रहेको देखिएको छ। उक्त रकम गत आ.व. को सोही अवधिको कुल सञ्चालन आय रु. ३४ अर्व ५६ करोड २ लाख ६५ हजारको तुलनामा रु. २ करोड ७८ लाख २३ हजार (अर्थात् ०.०८ प्रतिशत) ले कमी भएको हो।

यसैगरी यस आ.व. को चौथो त्रैमासिकसम्म कुल आय रु. ३८ अर्ब ७३ करोड ३३ लाख ४१ हजार रहेको छ। उक्त रकम गत आ.व. को सोहि अवधिको कुल आय रु. ४२ अर्ब ११ करोड ६९ लाख १० हजारको तुलनामा रु. ३ अर्ब ३८ करोड ३५ लाख ६९ हजार (अर्थात् ८.०३ प्रतिशत) ले कमी भएको छ।

सार्वजनिक भएको वित्तीय प्रतिवेदनअनुसार यस आ.व. को चौथो त्रैमासिकसम्म Earnings Before Interest, Taxes, Depreciation and Amortization (EBITDA) रु. १९ अर्व २५ करोड ९१ हजार रहेको छ। उक्त रकम गत आ.व. को सोहि अवधिको कर अघिको मुनाफा रु. १८ अर्व २ करोड ९ लाख ४४ हजारको तुलनामा रु. १ अर्ब २२ करोड ९१ लाख ४६ हजार (अर्थात् ६.८२ प्रतिशत) ले बढी भएको छ।

यस आ.व. को चौथो त्रैमासिकसम्म कर अघिको मुनाफा रु. ११ अर्व २१ करोड ६३ लाख ४८ हजार रहेको छ। उक्त रकम गत आ.व. को सोहि अवधिको कर अघिको मुनाफा रु. ११ अर्व २५ करोड ६ लाख ५१ हजारको तुलनामा रु. ३ करोड ४३ लाख २ हजार (अर्थात् ०.३० प्रतिशत) ले कमी भएको छ।

यस आ.व. को चौथो त्रैमासिकसम्म खुद मुनाफा रु. २ अर्व ६६ करोड ८१ लाख ९२ हजार रहेको। उक्त रकम गत आ.व. को सोहि अवधिको खुद मुनाफा रु. ६ अर्व २३ करोड ५५ लाख २ हजारको तुलनामा रु. ३ अर्ब ५६ करोड ७३ लाख ९ हजार (अर्थात् ५७.२१ प्रतिशत) ले कमी भएको उल्लेख छ।

कम्पनीको प्रति शेयर आम्दानी (annualized) रु. १४.८२ रहेको जनाएको छ।

कम्पनीकाअनुसार राजश्व तथा खुद मुनाफामा परिवर्तन हुनुका प्रमुख कारणहरु निम्नानुसार रहेको छ:-

• ओटीटी सेवाहरुको व्यापक प्रयोगका कारण विदेशबाट हुने आगमन कलको परिमाणमा असर परेका कारण अन्तरआवद्धता आयमा गत आ.व. को चौथो त्रैमासिकसम्मको तुलनामा करिब रु. ४१ करोड ९० लाख ७० हजार (अर्थात् १४ प्रतिशत) ले कम भएको । साथै ओटीटी सेवाले कम्पनीको समग्र भ्वाइस/एसएमएस सेवाको आयमा नकारात्मक प्रभाव परिरहेको छ।
• कम्पनीले गत वर्ष जीएसएम अनुमति पत्र नवीकरणको लागि रु. २० अर्ब एकमुष्ठ भुक्तानी गर्नुपरेको र सञ्चालक समितिको निर्णय बमोजिम कर्मचारीहरुको निवृत्तिभरणको व्यवस्थाको लागि गत वर्ष रु. ४ अर्ब ९७ करोड र यस आ.व. को तेस्रो त्रैमासिकसम्म करिब रु. १३ अर्ब १५ करोड छुट्टयाए पश्चात लगानीमा भएको कमी तथा ब्याज दर क्रमिकरूपमा घट्नुको कारणले व्याज आयमा गत आ.व. को चौथो त्रैमासिकसम्मको तुलनामा व्याज आय करिब रु. ३ अर्ब ७ करोड ११ लाख ४२ हजार (अर्थात् ४५.२९ प्रतिशत) ले घटी भएको छ।
• प्रतिस्पर्धी आईएसपीहरुले मोबिलिटी गरी वाई-फाई सेवा दिइरहेकोले मोबाइलको डाटा प्रयोगमा उल्लेखनीय कमी भएको।
• राष्ट्रको सञ्चार भएकोले बढी लागत तथा कम प्रतिफल प्राप्त हुने विकट तथा दुर्गम स्थानमासमेत सेवा विस्तार र गुणस्तर सुधारको कार्यमा निरन्तर लागिरहेको र लागतसमेत बढिरहेको ।
• सेवाको दररेट निर्धारण सम्बन्धि नीति तथा नियमहरु परिवर्तन भएको कारणले सेवाको दररेटमा कटौती भई राजश्वमा प्रतिकुल असर परेको।
• कम्पनीले नेपाल लेखामान १९ अनुसारको योगदानमा आधारित पेन्सन योजनाको खर्च लेखांकन तथा यस आ.व. मा रु. १३ अर्ब १५ करोड डिफाइन्ड बेनिफिट एसेस्ट्स (Defined Benefit Assets) मा थप रकम छुट्टाइएको लगायतका कारणबाट सिर्जना भएको स्थगन करको प्रभाव पर्न गएको।
• कम्पनीले गत वर्षसम्म कन्टिजेन्ट लाइबिलिटीज (Contingent Liabilities) मा देखाएको कर लगायतका केही मुद्दाहरुको यस आ.व.मा छिनोफानो भई कम्पनीलाई परेको थप आर्थिक भारलाई चालु आ.व.मा व्यवस्था गरिएको।
• कम्पनीले यस त्रैमासिकमा ऋण लगानीमा थप नोक्सानी व्यवस्था (Expected Credit Loss) गरिएको। त्यसैगरी अन्य सम्पत्तिमा पनि यस त्रैमासिकमा थप नोक्सानी व्यवस्था गरिएको।
• कम्पनीले नेपाल लेखामान १९ अनुसारको कर्मचारीको निवृत्तिभरणको व्यवस्था हिसाबको लागि अनुमानित डिस्काउन्ट रेट हालको वित्तीय बजारस्थिति तथा अपेक्षित प्रतिफलमा देखिएको गिरावटका कारण ७.५% बाट ७% मा घटेकोले कर्मचारीको निवृत्तिभरणको व्यवस्था बढेको।