आफ्नै स्टार्टअपमा ध्यान दिन डोहम्केले छोडे गिटहबको सीईओ पद

काठमाडौं ।

गिटहबका प्रमुख कार्यकारी थमस डोहम्केले माइक्रोसफ्टको स्वामित्वमा रहेको कोड होस्टिङ प्लेटफर्म छाडेर नयाँ स्टार्टअप सुरु गर्न लागेका छन्। यसबारे उनले सोमबार घोषणा गरेका हुन्। यो निर्णयले कम्पनीको कोपाइलट उत्पादनमार्फत कृत्रिम बुद्धिमत्तातर्फको ठूलो कदमलाई समेट्ने उनको कार्यकाललाई अन्त्य गर्न लागेको देखिन्छ।

रोयटर्सका अनुसार जर्मनीबाट एक दशकभन्दा बढी अगाडि आफ्नो स्टार्टअप माइक्रोसफ्टलाई बिक्री गरेपछि अमेरिकामा बसोबास गरेका डोहम्केले आफ्नो “स्टार्टअप रुट्स” ले यो निर्णय लिन प्रेरित गरेको बताएका छन्। “म फेरि एक पटक संस्थापक बन्न गिटहब छाड्ने निर्णयमा पुगेको छु,” उनले ब्लगमा लेखेका छन्। तर उनले नयाँ योजनाबारे विस्तृत जानकारी दिएका छैनन्।

सीईओ बन्नुअघि, डोहम्केले माइक्रोसफ्टमा मोबाइल डेभलपर उपकरणको नेतृत्व गरेका थिए र पूर्व सीईओ नट फ्राइडम्यानसँगै गिटहबको अधिग्रहणमा काम गरेका थिए। माइक्रोसफ्टले २०१८ मा गिटहबलाई ७.५ अर्ब डलरबराबरको सेयरमार्फत अधिग्रहण गरेको थियो।

गिटहबको वेबसाइट अनुसार, १५ करोडभन्दा बढी डेभलपरहरूले सफ्टवेयर परियोजना निर्माण, मर्मत र सहकार्यका लागि यसको उपकरण प्रयोग गर्छन्।

डोहम्केको उत्तराधिकारीबारे सोधिएको प्रश्नमा माइक्रोसफ्टले तत्काल प्रतिक्रिया दिएको छैन। उनको संक्रमण अवधि यो वर्षको अन्त्यसम्म रहनेछ।

डोहम्केले आफ्नो नेतृत्वमा गिटहबले विश्वव्यापी विस्तार गरेको, अमेरिकी संघीय प्रयोगका लागि फेडर्याम्प प्रमाणपत्र प्राप्त गरेको र प्लेटफर्ममा एआई परियोजनाको संख्या दोब्बर भएको बताएका छन्।

सबैभन्दा पहिले यो समाचार सार्वजनिक गर्ने एक्सियोसका अनुसार, माइक्रोसफ्टको डेभलपर डिभिजन प्रमुख जुलिया लिउसनले गिटहबको आम्दानी, इन्जिनियरिङ र समर्थनको नेतृत्व गर्नेछिन्।

गिटहबका प्रमुख उत्पादन अधिकारी मारियो रोड्रिगेजले माइक्रोसफ्टको एआई प्लेटफर्मका उत्पादन प्रमुख आशा शर्मालाई प्रतिवेदन दिनेछन्।