अमेरिकाको एउटा घरमा बज्रिएको उल्कापिण्ड पृथ्वीभन्दा पनि पुरानो भएको अध्ययनको खुलासा

काठमाडौं ।

जर्जियाको एटलान्टामा रहेको एउटा घरमा बज्रिएको उल्कापिण्ड ४.५६ अर्ब वर्ष पुरानो भएको एउटा नयाँ अध्ययनले पत्ता लगाएको छ। जुन २६ मा, जर्जियाको आकाशमा दिनको उज्यालोमा एक उल्कापिण्ड विस्फोट हुनुभन्दा पहिले प्रज्वलित भएको नासाले बताएको छ।

जर्जिया विश्वविद्यालयका अनुसन्धानकर्ताहरूले यसलाई वर्गीकृत गर्न र यसको उत्पत्ति पत्ता लगाउनका लागि बाह्य ग्रहीय चट्टानको टुक्राहरूको विश्लेषण गरेका छन्। साइन्स अलर्टले उक्त उल्कापिण्ड ४.५६ अर्ब वर्ष पहिले बनेको र पृथ्वीभन्दा लगभग २ करोड वर्ष पुरानो भएको रिपोर्ट गरेको छ।

शुक्रबार प्रकाशित समाचार विज्ञप्तिमा जर्जिया विश्वविद्यालयका ग्रहसम्बन्धी भूगर्भविद् स्कट ह्यारिसले २३ ग्राम उल्कापिण्डका टुक्राहरूको अध्ययन गरेपछि आफ्नो निष्कर्ष घोषणा गरेका थिए। उक्त उल्कापिण्डले हेनरी काउन्टीको म्याकडोनोमा एक मानिसको घर छेडेको र भुइँमा दाग बसेको उनले बताए।

ह्यारिसले ती टुक्राहरूलाई माइक्रोस्कोपमुनि जाँच गर्दा तिनीहरू ४.५६ अर्ब वर्ष पहिले बनेको उल्कापिण्डबाट उत्पन्न भएको पत्ता लगाए जुन पृथ्वीको अनुमानित उमेर ४.५४ अर्ब वर्ष अगाडि हो।

“वायुमण्डलमा प्रवेश गरेको म्याकडोनो नामक यो विशेष उल्का पिण्ड  जमिनमा पुग्नुभन्दा पहिलेको लामो इतिहास छ र यसलाई पूर्ण रूपमा बुझ्नको लागि हामीले वास्तवमा चट्टान के हो भनेर जाँच गर्नुपर्छ र यो कुन क्षुद्रग्रह समूहसँग सम्बन्धित छ भनेर निर्धारण गर्नुपर्छ”, ह्यारिसले समाचार विज्ञप्तिमा भने।

“यो त्यस्तो चीज हो जुन २० वर्षभित्र धेरै पटक होइन तर हरेक केही दशकमा एक पटक अपेक्षा गर्ने गरिन्छ। चासो दिने मानिसहरुका अतिरिक्त आधुनिक प्रविधिले हामीलाई धेरैभन्दा धेरै उल्का पिण्डहरू पुनः प्राप्त गर्न मद्दत गर्नेछ” ह्यारिसले थप उल्लेख गरे।

भूगर्भशास्त्रीले क्षुद्रग्रह संरचना र गतिमा आफ्नो अनुसन्धान प्रकाशित गर्ने लक्ष्य राखेका छन्, जसले सम्भावित क्षुद्रग्रह खतराहरूको हाम्रो बुझाई बढाउन सक्ने एनडीटिभीले रिपोर्ट गरेको छ।

यसैबीच घरधनीले उल्कापिण्डको ठक्करको प्रभावबाट आफ्नो घर वरिपरि अन्तरिक्ष धुलोको निशान फेला पारेको रिपोर्ट गरे। म्याकडोनो मेटेरोइट भनेर नाम दिइएको यो उल्कापिण्ड जर्जियामा फेला पारिएको २७ औं उल्कापिण्ड हो।