काठमाडौं ।
एनभिडियाका एच२० चिपले चीनका लागि सुरक्षा चिन्ता पैदा गरेको विषयमा, ती चिपमा ब्याकडोर पहुँचबारे बेइजिङले चिन्ता व्यक्त गरेपछि, चीनको सरकारी मिडियासँग सम्बन्धित एक सामाजिक सञ्जाल खाताले आइतबार जनाएको छ।
सीसीटीभीसँग सम्बन्धित युयुआन तान्टियन नामक खाताले वीच्याटमा प्रकाशित लेखमा एच२० चिप न त प्राविधिक रूपमा उन्नत छन्, न वातावरणमैत्री, र न सुरक्षित रहेको उल्लेख गरेको छ।
“जब कुनै प्रकारको चिप न वातावरणमैत्री हुन्छ, न उन्नत, न सुरक्षित हुन्छ, उपभोक्ताका रूपमा हामीसँग यो नकिन्ने विकल्प अवश्य हुन्छ,” लेखले निष्कर्ष निकालेको छ। एनभिडियाले यसबारेमा टिप्पणीको अनुरोधमा तत्काल प्रतिक्रिया जनाएन।
एच२० कृत्रिम बुद्धिमत्ता चिप अमेरिकी सरकारले २०२३ को अन्त्यतिर उन्नत एआई चिपको निर्यातमा प्रतिबन्ध लगाएपछि, चिनियाँ बजारका लागि एनभिडियाले विकास गरेको हो।
अमेरिकी राष्ट्रपति डोनाल्ड ट्रम्पको प्रशासनले चीनसँगको बढ्दो व्यापार तनावका बीच गत अप्रिलमा यसको बिक्रीमा प्रतिबन्ध लगाएको थियो, तर जुलाईमा उक्त प्रतिबन्ध फिर्ता लिएको थियो।
चीनको साइबरस्पेस नियामक निकायले जुलाई ३१ मा एनभिडियालाई बैठकमा बोलाएर एच२० चिपमा कुनै ब्याकडोर सुरक्षा जोखिम — अर्थात् सामान्य प्रमाणीकरण वा सुरक्षा नियन्त्रणलाई बाइपास गर्ने लुकेको तरिका — रहेको हो कि भनेर स्पष्ट पार्न आग्रह गरेको थियो। एनभिडियाले पछि आफ्ना उत्पादनमा टाढाबाट पहुँच वा नियन्त्रण गर्न दिने कुनै “ब्याकडोर” नरहेको दाबी गरेको थियो।
युयुआन तान्टियनले आफ्ना लेखमा एनभिडिया चिपले हार्डवेयर “ब्याकडोर” मार्फत “रिमोट शटडाउन” जस्ता कार्यसम्पादन गर्न सक्ने उल्लेख गरेको छ। युयुआन तान्टियनको टिप्पणी, अर्को सरकारी मिडिया पिपल्स डेलीले एनभिडियामाथि गरेको आलोचनापछि आएको हो।
यस महिनाको सुरुमा प्रकाशित टिप्पणीमा पिपल्स डेलीले एनभिडियाले आफ्ना चिपको सुरक्षा जोखिमबारे चिनियाँ प्रयोगकर्ताको चिन्ता हटाउन र बजार विश्वास पुनः हासिल गर्न “विश्वसनीय सुरक्षा प्रमाण” पेश गर्नुपर्ने उल्लेख गरेको थियो।
प्रकाशित: २६ श्रावण २०८२, सोमबार
