पब्जी विश्वकपमा ‘होर ई–स्पोर्ट्स’को शानदार प्रदर्शन, जित्यो १ करोड ७८ लाख रुपैयाँ पुरस्कार

काठमाडौं ।

नेपालको प्रतिनिधित्व गर्दै अन्तर्राष्ट्रिय स्तरमा प्रतिस्पर्धा गरेको ‘होर ई–स्पोर्ट्स’ टोलीले साउदी अरबमा सम्पन्न पब्जी विश्वकप २०२५ मा नवौँ स्थान हात पार्न सफल भएको छ। जुलाई २५ देखि २३ तारिखसम्म आयोजित फाइनल चरणमा १६ उत्कृष्ट टोलीहरूमध्ये नेपालले खेलेका १८ खेलमा कुल १०० अंक जोड्दै नवौँ स्थान सुनिश्चित गरेको हो।

यो सफलतासँगै नेपाली टोलीले एक लाख २७ हजार ५०० अमेरिकी डलर, अर्थात् करिब एक करोड ७८ लाख नेपाली रुपैयाँ पुरस्कार जित्न सफल भयो। यो नेपालको ई–स्पोर्ट्स इतिहासमा एक महत्वपूर्ण उपलब्धि मानिएको छ।

फाइनल चरणमा भिडेका नेपाली खेलाडीहरू

‘होर ई–स्पोर्ट्स’ टोलीमा नेपालका प्रतिभावान खेलाडीहरू आकाश राई, शीतल राई, सुप्रिम अधिकारी, उगेन छोपेल लामा, प्रवेश गुरुङ र आयुश लामा सहभागी थिए। टोली व्यवस्थापनमा उमेश बुढथापा म्यानेजरका रूपमा जिम्मेवारीमा थिए भने अफिसियलहरूमा सञ्जन गौतम र नवराम श्रेष्ठ रहका थिए।

ई–स्पोर्ट्समा होरले देखाएको होडले नेपाली युवाहरूलाई अन्तर्राष्ट्रिय मञ्चमा प्रतिस्पर्धा गर्ने हौसला दिएको छ। नेपालबाट विश्वस्तरीय प्रतियोगितामा सहभागिता जनाउनु र शीर्ष १० भित्र पर्नु गौरवको विषय हो। डिजिटल प्रतिस्पर्धाका माध्यमबाट नेपालले अब विश्व ई–स्पोर्ट्स नक्शामा स्थायी उपस्थिति जनाउने संकेत गरेको छ।

विश्वकपको उपाधि भने म्यानमारको ‘वाइजी ई–स्पोर्ट्स’ टोलीले जितेको छ। यस टोलीले करिब सात करोड नेपाली रुपैयाँ पुरस्कार जितेको छ। प्रतियोगितामा कुल पुरस्कार राशी ४१ करोड नेपाली रुपैयाँ थियो। यस पटकको प्रतिस्पर्धाले दक्षिण एसियाली देशहरूको उत्कृष्ट प्रदर्शन देखाएको छ, जसमा नेपाल पनि आत्मविश्वासका साथ उभिएको छ।