वालिङमा राष्ट्रिय परिचयपत्र वितरण सुरु

काठमाडौं ।

स्याङ्जाको वालिङमा रहेको इलाका प्रशासन कार्यालयबाट राष्ट्रिय परिचयपत्र वितरण सुरु गरिएको छ। इलाका प्रशासनमार्फत खिचिएका राष्ट्रिय परिचयपत्र वितरण सुरु गरिएको हो।

चापाकोट, गल्याङ र वालिङ नगरपालिका सबै वडा, हरिनासका तोन, बिरुवाका तोन, भिरकोटका तोन वटा वडाको नागरिकता, राहदानी, राष्ट्रिय परिचयपत्रलगायत प्रशासनिक सेवा गर्दै आएको छ। इलाका प्रशासन कार्यालयमा आएर फोटो खिचाएकाको मात्रै कार्ड वितरण सुरु गरिएको हो।

वडा वडामा घुम्ती शिविरमार्फत फोटो खिचाएकाको हकमा भने कार्ड आउन बाँकी रहेको इलाका प्रशासन कार्यालय वालिङका सूचना अधिकारि बुद्धिराम बुढाले जानकारी दिनुभयो।

विसं २०७८ देखि २०८१ पुससम्म फोटो खिचाएका ३२ हजारको कार्ड आएको हो। यो असार २२ गतेदेखि कार्ड वितरणका लागि मोबाइलको सिमकार्डमा म्यासेज पठाउन सुरु गरिएको छ। हालसम्म आठ हजार जनालाई म्यासेज पठाइएको कार्यालयले जनाएको छ।

परिचयपत्र वितरण गर्ने र फोटो खिच्ने एउटै स्टेसन भएकाले सबैलाई एकैसाथ म्यासेज पठाउन नसकिएको कार्यालयका सूचना अधिकारी बुढाले बताए। मोबाइलमा म्यासेज आएपछि मात्रै परिचयपत्र कार्ड लिन सेवाग्राही जान सक्ने छन्। आफ्नो मोबाइलमा म्यासेज आए/नआएको जाँच गरेर म्यासेज आएकाले मात्र आफ्नो कार्ड लिन कार्यालय जान अनुरोध गरिएको छ।

अहिलेसम्म इलाका प्रशासन कार्यालय वालिङमा ७० हजारभन्दा बढी सेवाग्राहीले राष्ट्रिय परिचयपत्रको फोटो खिचाइसकेका छन्। पहिलो चरणको ३२ हजार वितरण सकिएपछि अरू राष्ट्रिय परिचयपत्र पनि बिस्तारै आउने भएकाले सबैले पाउने प्रशासनले जनाएको छ।

पछिल्लो समय राष्ट्रिय परिचयपत्रलाई सरकारो कामकाजका लागि अनिवार्य भएकाले आवश्यक कागतजात पूरा गरेर मात्रै फोटो खिच्न आउन प्रशासनले आग्रह गरेको छ। यसअगाडि जिल्ला प्रशासन कार्यालय स्याङ्जाले राष्ट्रिय परिचयपत्र वितरण गर्दै आएको थियो।

आ‍जको गोरखापत्रबाट