एप्पलद्वारा आईओएस २६ को चौथो डेभलपर बीटा संस्करण सार्वजनिक, यस्ता छन् विशेषता

काठमाडौं ।

एप्पलले मंगलबार आफ्नो आगामी प्रमुख सफ्टवेयर अपडेट आईओएस २६को चौथो डेभलपर बीटा संस्करण सार्वजनिक गरेको छ जसमा लिक्विड ग्लास पुन:डिजाइनमा केही साना परिवर्तनहरू र समाचारका लागि एआई-सञ्चालित सूचना सारांश फिचर पुन: प्रस्तुत गरिएको छ साथै अन्य अपडेटहरू समावेश छन्।

टेकक्रञ्चका अनुसार यो अपडेट आईओएस २६को सार्वजनिक बीटा सुरु हुनुभन्दा केही अघिनै आएको हो, जुन यसै साताभित्र सार्वजनिक हुने अपेक्षा गरिएको छ।

डेभलपर बीटाहरू केही महिनामा सार्वजनिक हुने नयाँ अपरेटिङ सिस्टमको तयारी गर्न सकियोस् भन्नका लागि मोबाइल एप विकासकर्ताहरूलाई नयाँ सफ्टवेयरमा आफ्नो एप परीक्षण गर्न समय दिने उद्देश्यले ल्याइन्छ।

उपभोक्ताको प्रारम्भिक संस्करण प्रयोग गर्ने चासोका कारण, एप्पलले जून महिनामा हुने आफ्नो वर्ल्डवाइड डेभलपर कन्फरेन्सपछि वर्षौँदेखि सार्वजनिक बीटा उपलब्ध गराउँदै आएको छ।

यसले आईफोन प्रयोगकर्ताहरूलाई औपचारिक रूपमा विश्वभरि सार्वजनिक हुनुभन्दा अघि नै अपडेट गरिएको सफ्टवेयर प्रयोग गर्न सक्ने बनाउँछ र त्यस्ता बीटाहरूमा स्थायित्व र बगसम्बन्धी समस्या पनि कम हुने गर्छ।

नवीनतम डेभलपर बीटा (आईओएस २६बीटा ४) मा सार्वजनिक बीटामा प्रयोगकर्ताहरूले पाउने सुविधाहरूको झल्को देखिन्छ।

आईओएस २६बीटा ४ मा सफ्टवेयर अपडेट गर्दा देखिने नयाँ “वेलकम” स्क्रिन, सिरी र यसको एआई-संचालित सूचना सारांश तथा प्राथमिकता निर्धारण विकल्पहरू, साथै नयाँ डिजाइन गरिएको क्यामरा एपको लागि परिचयात्मक स्क्रिनहरू समावेश छन्।

यस वर्षको सुरुवातमा एप्पलले बीबीसीबाट उजुरी आएपछि एआई सूचना सारांश फिचरलाई रोकेको थियो। बीबीसीले सो फिचरले आफ्नो एउटा समाचार शीर्षकलाई गलत रूपमा प्रस्तुत गरेको बताएको थियो।

एआई-सञ्चालित समाचार सारांशले युनाइटेड हेल्थकेयरका सीईओ ब्रायन थम्प्सनको हत्या आरोपित लुइजी म्यान्जियोनले आत्महत्या गरेको गलत दावी गरेको थियो। यसको परिणामस्वरूप, एप्पलले यो एआई सारांश फिचर प्रयोग भइरहेको समयमा स्पष्ट संकेत दिने सफ्टवेयर अपडेट ल्याउने बताएको थियो।

अझै बीटा चरणमै रहेको यो एआई सारांश फिचरको सेटअप स्क्रिन “न्युज एण्ड एन्टरटेन्मेन्ट” खण्ड अन्तर्गत चेतावनी सन्देश समावेश गरिएको छ। यहाँ एप्पलले “सारांशले मूल शीर्षकको अर्थ परिवर्तन गर्न सक्छ” भनेर उल्लेख गरेको छ र प्रयोगकर्ताहरूलाई “जानकारीको पुष्टि गर्न” सल्लाह दिएको टेकक्रञ्चले उल्लेख गरेको छ।

नयाँ बीटा संस्करणको प्रारम्भिक प्रयोगकर्ताहरूले एप्पलले लिक्विड ग्लास नाम दिइएको आफ्नो प्रयोगकर्ता इन्टरफेस पुन:डिजाइनलाई अझ परिष्कृत गरिरहेको उल्लेख गरेका छन्।

बीटा ३ मा केही एपहरूमा पारदर्शिता घटाइएको भए पनि बीटा ४ मा ती परिवर्तनहरू उल्टाइएको छ। परीक्षकहरूले एप स्टोर, फोटोज, एप्पल म्युजिक, वेदरलगायत एपहरूमा अपडेटहरू देखिएको बताएका छन्, साथै नोटिफिकेशन सेन्टरमा स्क्रोल गर्दा गतिशील टिन्ट थपिएको उल्लेख छ।

प्रकाशनको समयसम्म एप्पलको डेभलपर वेबसाइटमा बीटा ४ का लागि रिलिज नोटहरू सार्वजनिक भइसकेका थिएनन्, त्यसैले साना बग फिक्स र कार्यसम्पादन सुधारका थप विवरणहरू अझै खुल्न बाँकी हुन सक्छन्।

यसै अपडेटसँगै एप्पलले आईप्याडओएस २६ बीटा ४, म्याकओएस २६ बीटा ४, वाचओएस १६ बीटा ४, टीभीओएस २६ बीटा ४, भिजनओएस २६ बीटा ४ र एक्सकोड २६ बीटा ४ पनि सार्वजनिक गरेको छ।