Technology Khabar ७ श्रावण २०८२, बुधबार
काठमाडौं ।
एप्पलको आगामी आईप्याड प्रो ट्याब्लेटमा दुईवटा फ्रन्ट–फेसिङ क्यामराहरू समावेश गरिने भएको छ। डिभाइसमा अब ल्यान्डस्केप मोडको अतिरिक्त पोट्र्रेट क्यामरा पनि उपलब्ध हुने भएको छ।
अब एम५ प्रोसेसरसहितको आईप्याड प्रोमा ल्यान्डस्केप र पोट्र्रेट गरी दुवै तरिकामा सेल्फी लिन समान रूपमा सजिलो हुने अपेक्षा गरिएको छ।
यो सानो सुधार जस्तो लागे पनि सेल्फी लिँदा वा फेसटाइम कलहरु गर्दा आईप्याड प्रोले सब्जेक्टमा फोकस गर्नको लागि दुवै क्यामराहरू प्रयोग गर्न सक्षम हुनेछ।
यसअघि आईप्याड मोडेलहरूमा पोट्र्रेट ऐजमा एउटा मात्र फ्रन्ट–फेसिङ क्यामरा उपलब्ध हुने गरेको थियो र एप्पलले सन् २०२४ मा एम४ प्रोसेसर भएको आईप्याड प्रोको लागि ल्यान्डस्केप साइडमा सार्ने निर्णय गरेको थियो।
नयाँ फ्रन्ट–फेसिङ क्यामराको अतिरिक्त, आगामी आईप्याड प्रोले एम५ प्रोसेसरको कारणले गर्दा थोरै प्रदर्शन सुधार र राम्रो पावर दक्षता ल्याउने अपेक्षा गरिएको छ।
यसका साथै, एप्पलले आफ्नो अर्को पुस्ताका प्रोसेसरहरूसँग भिजन प्रो, म्याकबुक प्रो, म्याक मिनी र आईम्याक अपग्रेड गर्ने योजना बनाइरहेको टेलीग्राफले रिपोर्ट गरेको छ।
प्रकाशित: ७ श्रावण २०८२, बुधबार
