रक्षासम्बन्धी अनुसन्धानमा सहकार्य गर्न बेलायत र ओपनएआईबीच सम्झौता

काठमाडौं ।

बेलायत र च्याटजीपीटी निर्माता कम्पनी ओपनएआईले एआई सुरक्षासम्बन्धी अनुसन्धानमा सहकार्य गहिरो बनाउने र डाटा सेन्टरजस्ता ब्रिटिश एआई पूर्वाधारमा लगानी गर्ने सम्भावनाको खोजी गर्न नयाँ रणनीतिक साझेदारी गरेका छन्।

“एआई मुलुकभर आवश्यक परिवर्तन ल्याउने महत्वपूर्ण साधन हुनेछ – चाहे त्यो नेशनल हेल्थ सर्भिस सुधार गर्ने, अवसरको पहुँच बढाउने वा आर्थिक वृद्धि अगाडि बढाउने होस्,” प्रविधि मन्त्री पीटर काइलले एक विज्ञप्तिमा भने।

“यो परिवर्तन अन्तर्राष्ट्रिय रूपमा अघि बढाइरहेका ओपनएआई जस्ता कम्पनीबिना सम्भव छैन। यो साझेदारीले ओपनएआईको थप कामहरू बेलायतमै गरिनेछ।”

रोयटर्सका अनुसार सरकारले एआई विकासका लागि कम्प्युटिङ पूर्वाधारमा १ अर्ब पाउण्ड लगानी गर्ने योजना अघि सारेको छ, जसबाट सार्वजनिक कम्प्युट क्षमतामा आगामी पाँच वर्षमा २० गुणासम्म वृद्धि गर्ने लक्ष्य राखिएको छ।

संयुक्त राज्य अमेरिका, चीन र भारत एआई विकासको दौडमा अगाडि देखिएका छन्, जसले युरोपलाई प्रतिस्पर्धामा टिक्न दबाब सिर्जना गरेको छ।

ओपनएआई सँगको यो साझेदारी, जसको माइक्रोसफ्टसँगको सहकार्य पहिले बेलायतको प्रतिस्पर्धा नियामकको निगरानीमा परेको थियो, अन्तर्गत कम्पनीले आफ्नो लण्डन कार्यालयको आकार बढाउने र न्याय, रक्षा, सुरक्षा तथा शैक्षिक प्रविधिजस्ता क्षेत्रमा एआई प्रयोगका सम्भावना खोज्ने जनाइएको छ।

उक्त विज्ञप्तिमै ओपनएआईका प्रमुख साम आल्टम्यानले प्रविधिको सम्भावना पहिचान गर्ने पहिलो देश भएकोमा बेलायती सरकारको प्रशंसा गरेका छन्। प्रधानमन्त्री कीर स्टार्मरद्वारा सुरु गरिएको “एआई अपर्च्युनिटिज एक्शन प्लान” मार्फत बेलायतलाई एआईमा विश्व नेतामा रूपान्तरण गर्ने लक्ष्य राखिएको छ।

सत्तामा आएको पहिलो वर्षमै ठोस आर्थिक वृद्धिमा असफल देखिएको लेबर सरकारले एआई प्रविधिबाट वार्षिक १.५ प्रतिशत उत्पादकत्व वृद्धि सम्भव हुने र यसले १० वर्षमा हरेक वर्ष थप ४७ अर्ब पाउण्ड बराबरको योगदान दिन सक्ने बताएको छ।