लिफ्टअफ हुनु ११ सेकेण्डअघि यसरी स्थगित गरियो स्पेसएक्सका दुई स्याटेलाइट प्रक्षेपण

काठमाडौं ।

स्पेसएक्सले सोमबार साँझ (जुलाई २१) दुईवटा सञ्चार उपग्रह प्रक्षेपण गर्ने तयारी गरेको भए पनि प्रक्षेपण हुनुअघि नै रोकियो। एसईएस कम्पनीका दुई O3b mPOWER इन्टरनेट उपग्रहसहितको फाल्कन ९ रकेट सोमबार बेलुका ५:२७ बजे (स्थानीय समय अनुसार) फ्लोरिडाको केप क्यानाभेरल स्पेस फोर्स स्टेशनबाट प्रक्षेपण हुने तयारीमा थियो। तर अन्तिम समयमा त्यो प्रक्षेपण रोकियो।

स्पेस डटकमकमा अनुसार लिफ्टअफ हुन ११ सेकेन्ड बाँकी रहँदा स्पेसएक्सले प्रक्षेपण रोक्ने निर्णय गरेको थियो। प्रक्षेपणको लागि करिब ९० मिनेटको समयावधि अझै बाँकी भए पनि कम्पनीले उक्त दिनका लागि योजना स्थगित गर्ने निर्णय गर्‍यो।

“@SES_Satellites को O3b mPOWER मिशनको आजको प्रक्षेपण स्थगित गरिएको छ, अब प्रक्षेपण मिति जुलाई २२ लाई सारिएको छ। रकेट र उपग्रह दुवै सुरक्षित अवस्थामा छन्,” स्पेसएक्सले सोमबार साँझ एक्समार्फत जानकारी दिएको थियो।

समाचार प्रकाशनको समयमा स्पेसएक्सले प्रक्षेपण रोक्नुको कारण स्पष्ट पारेको थिएन।

मंगलबारको प्रक्षेपणको लागि दुई घण्टाको विण्डो स्थानीय समय अनुसार बेलुका ५:१२ बजे (२१:१२ जीएमटी) खुल्नेछ। स्पेसएक्सले आफ्नो वेबसाइट र एक्स एकाउन्टमार्फत लिफ्टअफ हुनुभन्दा करिब १५ मिनेटअघि देखाउन सुरु गर्नेछ।

लक्जम्बर्गमा आधारित एसईएस कम्पनीको mPOWER कन्स्टेलेशनमा मध्यम पृथ्वी कक्षमा रहेका आठ उपग्रह छन्, जसलाई सबै स्पेसएक्सले नै प्रक्षेपण गरेको हो।