त्रिविले खुलायो सेमेष्टर प्रणालीमा आधारित स्नातक तह प्रथम सत्रमा भर्ना

काठमाडौं ।

त्रिभुवन विश्वविद्यालयले शैक्षिक वर्ष २०८२/०८३ का लागि सेमेष्टर प्रणालीमा आधारित स्नातक तह प्रथम सत्रमा भर्ना खुलाएको छ। विश्वविद्यालयले आज एक सूचना प्रकाशित गरी विज्ञान तथा प्रविधिलगायत मानविक र व्यवस्थापन संकायका सेमेस्टर प्रणालीमा आधारित विषयहरु अध्ययन गर्न चाहनेहरुका लागि जानकारी उपलब्ध गराएको हो।

‘त्रिभुवन विश्वविद्यालय मानविकी तथा सामाजिकशास्त्र संकाय, व्यवस्थापन संकाय, शिक्षाशास्त्र संकाय र विज्ञान तथा प्रविधि अध्ययन संस्थान अन्तर्गतका क्याम्पसहरुमा शैक्षिक वर्ष २०८२/०८३ को सेमेष्टर प्रणालीका लागि स्नातक तह (सेमेष्टर प्रणाली) प्रथम सत्रमा नयाँ विद्यार्थी भर्ना कार्यक्रम निम्नानुसार हुने भएकोले सम्बन्धित सबै संकाय/अध्ययन संस्थान, क्याम्पस तथा विद्यार्थीहरुको जानकारीका लागि यो सूचना प्रकाशित गरिएको छ’, सूचनामा उल्लेख छ।

भर्नासम्बन्धी कार्यक्रम यसप्रकार छ:

१. आवेदन फाराम वितरण र बुझाउने – २०८२ साउन दोस्रो हप्तादेखि भाद्र दोस्रो हप्तासम्म
२. कक्षा सञ्चालन -२०८२ मंसिरको पहिलो हप्तादेखि
३. अन्तिम परीक्षा -२०८२ चैत्रको दोस्रो हप्ता
४. नतिजा प्रकाशन -२०८३ असार

प्रवेश परीक्षा तथा भर्ना सम्बन्धी अन्य विस्तृत जानकारी सम्बन्धित डीनको कार्यालयले निर्धारण गरे अनुसार हुनेछ। भर्ना प्रक्रियाका लागि विद्यार्थीले प्रवेश चाहेको प्रत्येक संकाय अध्ययन संस्थान र विषय अनुसार सम्बन्धित संकाय/अध्ययन संस्थानमा बेग्लाबेग्लै आवेदन फाराम बुझाउनु पर्नेछ।

यसबाहेक अन्य विस्तृत जानकारी चाहिएमा सम्बन्धित डीन कार्यालयहरु र क्याम्पसबाट प्राप्त गर्न सकिने सूचनामा जनाइएको छ।