अमेरिकी सेनाका पूर्वसैनिक टेलिकम कम्पनीहरू ह्याक गरेर डाटा चुहाउन खोजेको आरोपमा दोषी

काठमाडौं ।

अमेरिकी सेनाका पूर्वसैनिक क्यामेरुन जोन वेजेनियस टेलिकम कम्पनीहरू ह्याक गरेर तिनीहरूलाई फाइल चुहाउने धम्की दिँदै ब्ल्याकमेल गर्न खोजेको अभियोगमा दोषी ठहरिएको अमेरिकी न्याय विभागले मंगलबार जनाएको छ।

विभागका अनुसार “kiberphant0m” उपनामले अनलाइन सक्रिय रहेका वेजेनियसले १० वटा कम्पनीहरूका लगइन प्रमाणहरू चोरेर तिनीहरूलाई धोका दिने योजना बनाएका थिए। उनले ब्रुट फोर्स आक्रमण लगायतका प्रविधिको प्रयोग गरेर ती प्रमाणहरू चोरेका थिए र टेलिग्राम समूहहरूमा ती विवरणहरू साटासाट गर्ने र ह्याकबारे छलफल गर्ने गरेका थिए।

टेकक्रञ्चका अनुसार वेजेनियस र उनका सहयोगीहरूले पीडित कम्पनीहरूलाई व्यक्तिगत रूपमा र सार्वजनिक रूपमा समेत ब्ल्याकमेल गरेका थिए। उनीहरूले कुख्यात ह्याकिङ फोरम ब्रिचफोरम्स जस्ता प्लेटफर्ममा समेत धम्की दिएका थिए।

केही चोरेका डाटा उनीहरूले बिक्री गरेका थिए भने ती प्रमाणहरू प्रयोग गरेर सिम स्वापिङलगायतका अन्य ठगी कार्य समेत गरेका थिए। यस वर्षको सुरुमा वेजेनियस एटीएण्डटी र भेरिजोन ह्याक गरेको अभियोगमा पहिल्यै दोषी मानेका थिए, जसको परिणामस्वरूप ठूलो परिमाणमा चोरी गरिएको कल रेकर्ड भेटिएको थियो।

वेजेनियसको सजाय सुनुवाइ अक्टोबर ६ मा तय गरिएको छ, र उनलाई अधिकतम २० वर्ष जेल सजाय हुनसक्ने प्रेस विज्ञप्तिमा जनाइएको छ। उनी क्लाउड कम्प्युटिङ सेवा प्रदायक कम्पनी स्नोफ्लेकमा भएको सुरक्षा जोखिमबाट सुरु भएका ह्याकहरूको श्रृंखलासँग पनि जोडिएका छन्।