काठमाडौं ।
अल्फाबेट अन्तर्गतको स्वचालित सवारी प्रविधि कम्पनी वेमोले सोमबार फिलाडेल्फिया र न्युयोर्क सहरतर्फ दुई वटा “रोड ट्रिप” सुरु गरेको छ जसले कम्पनीको उत्तरपूर्वी सहरहरूमा विस्तारको चासो देखाएको संकेत गर्छ।
वेमोका यस्ता “रोड ट्रिप” हरू तुरुन्त व्यावसायिक सेवा सुरु हुने भन्ने अर्थमा नहुन सक्छन् । कम्पनीले यस वर्ष ह्युस्टन, ओरल्यान्डो, लस भेगास, सान डिएगो र सान एन्टोनियो जस्ता सहरहरूमा पनि यस्तै रोड ट्रिप घोषणा गरिसकेको छ ।
यस्ता यात्रामा सामान्यतः वेमोले आफ्नो स्वचालित ड्राइभिङ प्रणाली जडित मानिसद्वारा चलाइएका सवारीहरू सहरमा पठाउने गर्छ, जसले नयाँ क्षेत्रको नक्साङ्कन गर्छ। त्यसपछि ती सवारीहरू स्वचालित रूपमा परीक्षण गरिन्छन्, तर सवारीमा अझै मानव चालक नै रहन्छन् । परीक्षणबाट सङ्कलित डाटा र अनुभव कम्पनीका इञ्जिनीयरहरूलाई एआई चालकको प्रदर्शन सुधार गर्न मद्दत पुर्याउने उद्देश्यले प्रयोग गरिन्छ।
कतिपय अवस्थामा यस्ता यात्राबाट व्यावसायिक सेवा सुरु भएका उदाहरण छन्। सन् २०२३ मा कम्पनीले लस एन्जलस काउन्टीको सान्ता मोनिका सहरको यात्रा गरेको थियो। अहिले कम्पनीले लस एन्जलसका सान्ता मोनिका, बेभर्ली हिल्स र हलिउड क्षेत्रमा व्यावसायिक सेवा सञ्चालन गरिरहेको छ।
फिलाडेल्फियामा वेमोले सबैभन्दा जटिल क्षेत्रहरूमा आफ्नो सवारी राख्ने योजना बनाएको प्रवक्ताले जनाएका छन्। उनले जनाएअनुसार नर्थ सेन्ट्रलदेखि इस्टविक, युनिभर्सिटी सिटी हुँदै डेलावेर नदीसम्मका विभिन्न फिलाडेल्फिया छिमेकहरूमा वेमो सवारीहरू दिनरात देखिन सक्छन्।
टेकक्रञ्चका अनुसार न्युयोर्क सहरमा वेमोका गाडीहरू म्यानह्याटनको सेन्ट्रल पार्कको उत्तर भागदेखि डाउनटाउन ब्रुकलिनसम्म र केही क्षेत्रमा म्यानुअल हिसाबले चलाइनेछन्। कम्पनीले न्यु जर्सीको जर्सी सिटी र होबोकेन क्षेत्रको पनि नक्साङ्कन गर्नेछ।
वेमोले गत महिनामात्र न्युयोर्क सहरमा मानव चालकसहितको स्वचालित सवारी परीक्षण गर्न अनुमति मागेको थियो, तर हालसम्म स्वीकृति पाएको छैन।
यो कम्पनीको पहिलो पटकको “बिग एप्पल” भ्रमण भने होइन। वेमोले सन् २०२१ को अन्त्यतिर म्यानह्याटन र न्यु जर्सीका केही भाग नक्साङ्कन गर्न सानो बेडाहरू परिचालन गरेको थियो। यसै वर्षको जाडोयाममा कम्पनीले बफेलो सहरमा हिउँदको अवस्था परीक्षण गर्न अर्को रोड ट्रिप गरेको थियो।
प्रकाशित: २७ असार २०८२, शुक्रबार
