काठमाडौं ।
एप्पलको आगामी आईओएस २६ अपडेटलाई हालसम्मकै सबैभन्दा ठूलो परिवर्तनको रूपमा हेरिएको छ ।
नयाँ “लिक्विड ग्लास” इन्टरफेसले भविष्यमा बटनविहीन आईफोन ल्याउने संकेत दिन्छ । तर छोटो अवधिका लागि, कम्पनीले सार्वजनिक बीटा संस्करण सँगै केही महत्वपूर्ण र व्यवहारिक सुरक्षा सुविधाहरू समावेश गर्दैछ जुन यो महिना पछि सार्वजनिक हुने अपेक्षा गरिएको छ।
एप्पलले प्रयोगकर्ताको गोपनीयता र सुरक्षा सधैं प्राथमिकतामा राख्ने बताउँदै आएको छ, र आईओएस २६मा पनि त्यही उद्देश्यलाई निरन्तरता दिइएको देखिन्छ ।
हाल धेरै मानिसहरू अनलाइन भिडियो कलमार्फत अपरिचितबाट ठगिने वा ब्ल्याकमेल हुने समस्यामा परिरहेका छन् । यस्तो अवस्थालाई समाधान गर्न, एप्पलले फेस टाइम भिडियो कलमा कसैले लुगा खोल्न खोजेमा वा अश्लील गतिविधि देखिएमा कल स्वतः ब्लक हुने विशेषता परीक्षण गरिरहेको छ।
यो न्यूडिटी डिटेक्सन फिचर केवल बच्चाहरूका लागि मात्र नभई, वयस्क प्रयोगकर्ताहरूमा पनि स्वतः सक्रिय हुने गरी सेटिङमा राखिएको छ।
न्युज१८ का अनुसार बीटा संस्करणमा देखिएको यो फिचर सक्रिय हुँदा यदि कुनै आपत्तिजनक दृश्य देखा परेमा एउटा पपअप संवाद बाकस देखिन्छ जसमा प्रयोगकर्तालाई कल अन्त्य गर्ने वा अडियो-भिडियो जारी राख्ने विकल्प दिइन्छ।
एप्पलले यो सुविधा मेसिन लर्निङ प्रविधिको माध्यमबाट अश्लील वा अनुपयुक्त सामग्री पहिचान गर्न प्रयोग गरिरहेको छ, जसले विशेष गरी बालबालिकाको सुरक्षामा थप सहयोग पुर्याउने बताइएको छ।
तर, यसलाई वयस्क प्रयोगकर्ताहरूमा पनि लागू गर्ने निर्णय एप्पलको साहसी कदम मानिएको छ । यद्यपि अहिले यो सुविधा बीटा संस्करणमै सीमित छ, त्यसैले अन्तिम सार्वजनिक संस्करणमा पनि रहने वा नरहने भन्ने स्पष्ट छैन।
यसको वास्तविक उपलब्धता भने आईओएस २६ को सार्वजनिक बीटा आउँदासम्म मात्र प्रस्ट हुने जनाइएको छ।
प्रकाशित: २४ असार २०८२, मंगलवार
