नथिङले बोल्ड डिजाइन र प्रिमियम साउन्डको साथ हेडफोन (१) लन्च गर्यो

काठमाडौं ।

नथिङले अब आफ्नै शैलीमा ओभर–इयर हेडफोन गेममा प्रवेश गरेको छ। जुलाई १ तारिखमा लन्डनमा भएको आफ्नो लन्च कार्यक्रममा कम्पनीले हेडफोन (१) अनावरण गरेको छ। ट्रान्सप्यारेण्ट (पारदर्शी), सुविधायुक्त वायरलेस हेडफोनको मूल्य २९९ अमेरिकी डलर (वा भारतमा प्रारम्भिक छुट सहित १९,९९९ भारतीय रुपैयाँ) कायम गरिएको छ। नथिङ फोन (३) सँगसँगै लन्च गरिएको यो वायरलेस हेडफोन कम्पनीको पूर्ण–आकारको अडियो स्पेसमा पहिलो प्रवेश भएको जनाइएको छ।

ब्रिटिश अडियो विशेषज्ञ केईएफसँग सह–विकास गरिएको हेडफोन (१) ले नथिङको सिग्नेचर ट्रान्सप्यारेण्ट (पारदर्शी) डिजाइनलाई लाइटवेट (हल्का तौल) एल्युमिनियम फ्रेम र स्क्वायरकल आकारको इयरकपसँग जोडेको बताइएको छ। हेडफोन (१) को ट्रान्सप्यारेण्ट (पारदर्शी) डिजाइनले गर्दा यसको केही आन्तरिक भागहरू देख्न सकिने छ। हेडफोन (१) को तौल ३२९ ग्राम रहेको छ र यो सोनीको डब्ल्यूएच–१०००एक्सएम६ भन्दा अलि भारी भएको बताइएको छ। तर मेमोरी फोम र ओयल–रेसिस्ट्याण्ट (तेल प्रतिरोधी) पीयू लेदर (छाला) को प्रयोगले हेडफोन (१) लाई आरामदायी बनाएको दाबी गरिएको छ।

अडियोको सन्दर्भमा, ४० एमएम डाइनामिक ड्राइभर्सद्वारा संचालित हेडफोनले एड्याप्टिभ बास ट्युनिङ, डाइनामिक हेड ट्र्याकिङको साथ स्पासियल अडियो र स्ट्रोङ्ग एक्टिभ नोइज क्यान्सिलेसन (एएनसी) लाई समर्थन गर्दछ। प्रारम्भिक समीक्षा अनुसार, एएनसी र ट्रान्सपेरेन्सी मोडले भरपर्दो प्रदर्शन गरेको बताइएको छ भने ब्याट्री जीवन ८० घण्टासम्म (वा एएनसी सक्रिय हुँदा लगभग ३५ घण्टा) टिक्ने दाबी गरिएको छ। त्यसैगरी क्विक (द्रुत) ५ मिनेट चार्ज गर्दा हेडफोनले एएनसी सक्रिय हुँदा लगभग २.४ घण्टा प्लेब्याक र एएनसी निष्क्रिय हुँदा ५ घण्टासम्मको प्लेब्याक प्रदान गर्ने उल्लेख गरिएको छ।

हेडफोन (१) को कन्ट्रोल्स (नियन्त्रणहरू) पनि उत्कृष्ट भएको जनाइएको छ। इयरकपमा रहेको ट्याक्टाइल रोलरले भोल्युम र प्लेब्याक समायोजन गर्दछ भने यसको छुट्टै बटनले नथिङ एक्स एप मार्फत एआई सहायकहरूमा द्रुत पहुँच प्रदान गर्नेछ। हेडफोन (१) मा प्रयोगकर्ताको लागि मनपर्ने साउण्ड (ध्वनि) ट्युन गर्नको लागि ८–ब्यान्ड ईक्यू पनि उपलब्ध गराइएको छ। यस बाहेक प्रारम्भिक प्रभावहरूले हेडफोनहरू बास–फर्वार्ड छन् भन्ने सुझाव दिएको छ।

हेडफोन (१) को प्रि–अर्डरहरू जुलाई ४ तारिखमा खुल्नेछन् भने यसको पूर्ण बिक्री जुलाई १५ तारिखबाट फ्लिपकार्ट र भारतका चुनिएका खुद्रा पसलहरू मार्फत सुरु हुनेछ।

बोल्ड एस्थेटिक्स, केईएफ–ट्युन्ड अडियो र लामो समयसम्म टिक्ने ब्याट्रीको साथ हेडफोन (१) ले स्पष्ट रूपमा सोनी डब्ल्यूएच–१०००एक्सएम६ र एयरपड्स म्याक्सलाई टक्कर दिने लक्ष्य राखेको छ। यो साँच्चै प्रतिस्पर्धा गर्न सक्छ कि सक्दैन भन्ने कुरा रियल–वर्ल्ड पर्फमेन्समा निर्भर हुने उल्लेख गरिएको छ। तर नथिङको पहिलो ओभर–इयर प्रयासले बलियो सुरुवाती प्रभाव पार्ने तथ्यलाई अस्वीकार गर्न नसकिने गीज्मोचाइनाले रिपोर्ट गरेको छ।