डिजिटल ठगी बढ्दो, सचेत रहन प्रहरीको आग्रह

काठमाडौं ।

सोमबार दिउँसो धेरै पत्रकारको फेसबुक म्यासेन्जरमा एकै प्रकारको सन्देश प्रवाह भइरह्यो। नेपाल प्रेस युनियनका अध्यक्ष शिव लम्सालले पठाएको सन्देशमा अनेक समस्या देखाएर रकमका साथै वान टाइम पासवर्ड (ओटीपी) माग गरिएको थियो।

सन्देश हेर्नासाथ फेसबुकका अधिकांश साथी केहीले रकम पठाउन थाले, कोहीले ओटिपी दिन थाले, केही स्वयम् लम्साललाई फोन गरी सहयोगको हात फैलाउन थाले।

तर यसरी आफ्नै फेसबुकबाट यत्रतत्र सहयोग मागिएका सन्देश प्रवाह भएकोबारे अध्यक्ष लम्साल भने अनभिन देखिए। तत्कालै फेसबुक खोल्न खोज्दा उनको फेसबुक खाता नियन्त्रणबाहिर पुगिसकेको थियो। यसबारे तत्कालै उनले नेपाल प्रहरीको साइबर ब्युरोमा खबर गरे।

ब्युरोले उनको फेसबुक खाता ह्याक भएको पुष्टि गर्यो र तत्काल सो खाता बन्द गरिदियो। प्रहरीकै सक्रियतामा उनको बैक खातासहित सबै डिजिटल कारोबार रोक्का गरियो। यति गर्दा ह्याकरले लम्सालका फेसबुकमा रहेका साथीसँग झन्डै ५० हजार रुपैयाँ रकम ठग्न पुग्यो।

यसरी ह्याकरबाट लम्साललाई सहयोग गर्ने बहानामा ठगिने अधिकांश पत्रकार छन्। फेसबुक म्यासेन्जरमा आएको सन्देशलाई आधार मान्दा आमसर्वसाधारण मात्र नभई स्वयम् सचेत वर्ग पत्रकार पनि कसरी सजिलै ठगिन्छन् भन्ने यो प्रतिनिधिमूलक घटना बन्न पुग्यो।

अनलाइन माध्यमबाट चिट्ठा, अनलाइन सपिङ ई बैङ्किङमार्फत सबैभन्दा बढी ठगी हुने गरेका छन्। सामाजिक सञ्जालको बढ्दो प्रयोगसँगै विभिन्न माध्यमबाट ठगी हुने क्रम पछिल्लो समय बढ्दै गएको छ।

साइबर ब्युरोका प्रवक्ता दीपक अवस्थीका अनुसार यस वर्ष मात्र झन्डै आठ हजार व्यक्तिको एक अर्ब रुपियाँभन्दा बढी रकम यसै गरी विभिन्न माध्यमबाट ठगिएको छ। उनले भने, “अनलाइन माध्यमबाट चिट्ठा अनलाइन सपिङ ई बैकिङमार्फत सबैभन्दा बढी ठगो हुने गरेका छन्।”

प्रवक्ता अवस्थीका अनुसार भाइरस, मालवेयर, सेयर कारोबारका नाममा खुलेका विभिन्न साइट र कनेक्ट आइपिएस. इसेवाको नक्कली एप वा लिङ्क तयार गरी ठगी गर्ने क्रम बढ्दै गएको छ। यस्ता उच्च प्रविधिको प्रयोगबाट हुने ठगी विश्वका जुनसुकै कुनाबाट हुने भएकाले यसको नियन्त्रण र अनुसन्धान अत्यन्त कठिन हुने हुँदा आधिकारिताको सुनिश्चितता गरेर मात्र कारोबार गर्न प्रहरीले सुझाएको छ।

आजको गोरखापत्रबाट