काठमाडौं ।
टेस्लाले आइतबार टेक्सासको अस्टिन शहरमा सानो समूहका सेल्फ-ड्राइभिङ ट्याक्सीहरू परिचालन गर्दै भाडा तिरेर चढ्ने यात्रुहरूलाई सेवा दिन सुरु गरेको छ। सीईओ इलन मस्कले यसलाई “रोबोट्याक्सी सुरुवात” भनेर घोषणा गरेका छन् भने सामाजिक सञ्जालका प्रभावशाली प्रयोगकर्ताहरूले आफ्ना पहिलो यात्रा भिडियोहरू सेयर गरेका छन्।
यो घटनाले पहिलोपटक टेस्ला कारहरूले मानव चालकबिनै भाडाका यात्रु बोकेको संकेत गर्छ। मस्कले यस व्यवसायलाई इलेक्ट्रिक गाडी निर्माता कम्पनीको आर्थिक भविष्यको लागि अत्यन्त महत्वपूर्ण मानेका छन्।
रोयटर्सका अनुसार मस्कले सामाजिक सञ्जाल प्लेटफर्म एक्समा लेख्दै यो क्षणलाई “दश वर्षको कठिन परिश्रमको परिणति” भनेका छन्। उनले “एआई चिप र सफ्टवेयर टिमहरू टेस्ला भित्रैबाट सुरु गरिएको” बताएका छन्।
आइतबार बिहान साउथ कंग्रेस नामको बस्तीमा चालकविनाका टेस्ला कारहरू देखिएका थिए, जसमा यात्रु सीटमा एक जना मात्र थिए। कम्पनीले करिब १० वटा गाडीहरू सहितको सानो परीक्षणको योजना बनाएको थियो, जसमा अगाडिको सिटमा रहेका यात्रुहरूलाई “सुरक्षा निगरानीकर्ता” को भूमिका दिइएको थियो। तर उनीहरूले गाडीमाथि कति नियन्त्रण राख्थे भन्ने स्पष्ट छैन।
हालका दिनहरूमा कम्पनीले सीमित क्षेत्रमा चलाइएको परीक्षणका लागि केही प्रभावशाली प्रयोगकर्ताहरूलाई निमन्त्रणा पठाएको थियो। यी यात्राहरू ४.२० डलरमा उपलब्ध गराइएको मस्कले एक्समा बताएका छन्।
टेस्लाका लगानीकर्ता तथा सामाजिक सञ्जाल प्रयोगकर्ता सयर मेरिटले आइतबार दिउँसो एक्समा भिडियो सेयर गर्दै आफूले टेस्ला रोबोट्याक्सी एप प्रयोग गरी गाडी अर्डर गरेको, त्यसमा चढेको र नजिकैको बार तथा रेस्टुरेन्टमा यात्रा गरेको देखाएका छन्।
यदि टेस्लाले सानो परिचालन सफलतापूर्वक पूरा गर्न सक्यो भने पनि अस्टिन र अन्य शहरहरूमा छिटो विस्तार गर्ने मस्कको वाचा पूरा गर्न अझै ठूलो चुनौतीहरू बाँकी रहेको उद्योग विशेषज्ञहरूको भनाई छ।
कार्नेगी मेलोन विश्वविद्यालयका कम्प्युटर इन्जिनियरिङ प्राध्यापक फिलिप कूपम्यानका अनुसार टेस्ला वा अल्फाबेटको वेमोजस्ता यसका प्रतिस्पर्धीहरूले रोबोट्याक्सी उद्योग पूर्ण रूपमा विकास गर्न वर्षौँ वा दशक लाग्न सक्छ।
टेस्लाको लागि अस्टिन परीक्षण सफल भए पनि, उनले भने, “यो सुरुवातको अन्त्य हो, अन्त्यको सुरुवात होइन।”
प्रकाशित: ९ असार २०८२, सोमबार
