होण्डा समर्थित स्टार्टअपद्वारा ‘हेल्म डट एआई भिजन’ नामक क्यामरा-आधारित प्रणाली सार्वजनिक

काठमाडौं ।

होन्डा मोटरबाट समर्थन प्राप्त स्टार्टअप हेल्म.एआईले बिहीबार ‘हेल्म.एआई भिजन’ नामक क्यामरा-आधारित प्रणाली सार्वजनिक गरेको छ जसले सहरी वातावरणको विश्लेषण गर्न सक्छ। कम्पनीले आफ्नो सेल्फ-ड्राइभिङ प्रविधि आम गाडीहरूमा प्रयोग गर्न अन्य कार निर्माता कम्पनीहरूसँग छलफल भइरहेको जनाएको छ।

हेल्म.एआई जापानी कम्पनी होन्डासँग मिलेर आगामी २०२६ मा आउने ‘होन्डा जिरो’ सिरिजका इलेक्ट्रिक गाडीहरूमा यो प्रविधि प्रयोग गर्ने तयारीमा छ। यसले प्रयोगकर्तालाई हात नलगाई तथा आँखा सडकबाट हटाएर गाडी चलाउन सघाउनेछ।

“हामी धेरै ओइइएमहरूसँग छलफलमा छौं र हाम्रो प्रविधि उत्पादनमा लागू गर्ने दिशामा छौं,” हेल्म.एआईका प्रमुख कार्यकारी अधिकृत र संस्थापक भ्लादिस्लाभ भोरोनिन्स्कीले रोयटर्ससँग भने।

“हाम्रो व्यवसाय मोडेल भनेको यो प्रकारको सफ्टवेयर तथा फाउन्डेसन मोडेल सफ्टवेयर कार निर्माताहरूलाई लाइसेन्स दिनु हो,” उनले भने।

क्यालिफोर्नियास्थित यो स्टार्टअपको ‘भिजन-फर्स्ट’ दृष्टिकोण एलन मस्कको टेस्लासँग मेल खान्छ, जसले पनि लिडार वा राडारजस्ता वैकल्पिक सेन्सरभन्दा क्यामेरा प्रणालीमा बढी निर्भर गर्दछ, कारण ती वैकल्पिक सेन्सरहरूले लागत बढाउँछन्।

यद्यपि भोरोनिन्स्कीका अनुसार हेल्म.एआईसँग अन्य सेन्सरहरूसँग काम गर्ने फाउन्डेसन मोडेलहरू पनि छन्, तर यसको प्रमुख उत्पादन भने क्यामेरा-आधारित नै हो।

उद्योग विशेषज्ञहरूका अनुसार कम देखिने अवस्थाहरूमा क्यामेराको प्रदर्शन कमजोर हुनसक्ने भएकाले अन्य सेन्सरहरू आवश्यक हुन्छन्।

अल्फाबेटको वेमो र मे मोबिलिटीजस्ता रोबोट्याक्सी कम्पनीहरूले वातावरण बुझ्नका लागि राडार, लिडार र क्यामेराको संयोजन प्रयोग गर्छन्।

यो प्रणाली एनभिडिया र क्वालकमजस्ता कम्पनीहरूले बनाएका विभिन्न हार्डवेयर प्लेटफर्महरूका लागि अनुकूलित गरिएको छ, जसले कार निर्माता कम्पनीहरूलाई आफ्नै सिष्टममा हेल्म.एआई भिजनलाई सहज रूपमा समावेश गर्न सक्षम बनाउँछ।