एघार महिनामा ३२ अर्बमाथिको स्मार्टफोन आयात, जेठमा मात्र स्मार्टफोनका लागि ३ अर्ब ३१ करोड बाहिरियो

काठमाडौं ।

नेपालमा स्मार्टफोनको आयात बढ्ने क्रममा महिनैपिच्छे तीव्रता देखिँदै आएको छ। २०८२ सालको जेठ महिनामा पनि यो प्रवृत्तिले निरन्तरता पाएको छ।

भन्सार विभागको आर्थिक वर्ष २०८१/८२ को २०८२ जेठ मसान्तसम्मको वैदेशिक व्यापारको तथ्यांक अनुसार ३२ अर्ब ८ करोड ७८ लाख १ हजार रुपैयाँ बराबरको स्मार्टफोन आयात भएको छ।

चालु आर्थिक वर्षको यो अवधिसम्म उक्त रकम बराबरको १९ लाख ७५ हजार ५१३ थान स्मार्टफोन आयात भएको हो।

तुलनात्मक रुपमा हेर्दा अघिल्लो महिना अर्थात् २०८२ वैशाख मसान्तबाट जेठ मसान्तसम्म आइपुग्दा ३ अर्ब ३१ करोड ८८ लाख ४३ हजार बराबरको १ लाख ८९ थान ८५९ स्मार्टफोन आयात भएको देखिन्छ।

यो आँकडा चैत्र मसान्तबाट २०८२ वैशाख मसान्तसम्म आइपुग्दा ३ अर्ब ३८ करोड ४४ लाख ८१ हजार बराबरको २ लाख ६९८ थान रहेको थियो।

चालु आर्थिक वर्षको एघारौं महिनामा सरकारले स्मार्टफोनको आयातबाट ५ अर्ब ९८ करोड २१ लाख २ हजार रुपैयाँ राजश्व संकलन गरेको छ। नेपालमा यो अवधिमा ६३ मुलुकबाट स्मार्टफोन आएको भन्सार विभागको तथ्यांकमा देखिन्छ।

नेपालमा सबैभन्दा धेरै स्मार्टफोन चीनबाट आउने गरेको छ। यो महिनामा चीनबाट २२ अर्ब २२ करोड ५१ लाख ९६ हजार रुपैयाँ बराबरको १५ लाख ७ हजार ५४० थान स्मार्टफोन आयात भएको छ।

भारतबाट ९ अर्ब २९ करोड ५२ लाख २५ हजार रुपैयाँ बराबरको ३ लाख ९७ हजार ३६८ थान स्मार्टफोन आएको भन्सार विभागको तथ्याङ्कमा देखिन्छ।

बाँकी ६१ मुलुकबाट पनि विभिन्न परिमाण र रकमका स्मार्टफोनहरु आयात भएका छन्।

यस्तो छ उत्कृष्ट ३ अंकसम्मको परिमाणमा आयात भएका देशको विवरण: