अमेजनले अष्ट्रेलियामा डाटा सेन्टर पूर्वाधारका लागि १३ अर्ब डलर लगानी गर्ने

काठमाडौं ।

अमेजनले सन् २०२५ देखि २०२९ सम्म अष्ट्रेलियामा डाटा सेन्टर पूर्वाधार विस्तार, सञ्चालन र मर्मतसम्भार गर्नका लागि २० अर्ब अस्ट्रेलियन डलर (१२.९७ अर्ब अमेरिकी डलर) लगानी गर्ने भएको छ। यसबारेमा कम्पनीले शनिबार आफ्नो ब्लग पोस्टमार्फत जानकारी गराएको हो।

घोषणा अनुसार यो लगानी अष्ट्रेलियाको कृत्रिम बुद्धिमत्ता (एआई) क्षमतालाई बलियो बनाउने उद्देश्यसहित गरिनेछ।

यो लगानी अष्ट्रेलियामा अमेजनको अहिलेसम्मकै सबैभन्दा ठूलो प्रविधि प्रतिबद्धता हो। लगानी नयाँ सर्भर क्षमताका साथै जेनेरेटिभ एआई कार्यभारको समर्थनमा केन्द्रित हुनेछ।

रोयटर्सका अनुसार अमेजनले भिक्टोरिया र क्विन्सल्याण्डमा तीनवटा नयाँ सोलार फार्ममा पनि लगानी गरिरहेको छ। कम्पनीले ती तीनवटा फार्मबाट संयुक्त रूपमा १७० मेगावाटभन्दा बढी विद्युत् क्षमता खरिद गर्न प्रतिबद्धता जनाएको छ।

“अमेजन वेब सर्भिसेसको अष्ट्रेलियामा डाटा सेन्टरका लागि २० अर्ब डलरको लगानीले हामीलाई भविष्यका लागि तयार पार्नेछ, हाम्रो अर्थतन्त्र र उत्पादकत्वलाई सशक्त बनाउनेछ,” अष्ट्रेलियाका प्रधानमन्त्री एन्थोनी अल्बनीजले सामाजिक सञ्जाल एक्समा लेखेका छन्। उनले यो लगानी अष्ट्रेलियाको अर्थतन्त्रप्रति ठूलो विश्वासको संकेत भएको बताएका छन्।

विश्वभरका ठूला प्रविधि कम्पनीहरू जेनेरेटिभ एआई र क्लाउड कम्प्युटिङको तीव्र रूपमा बढ्दो मागलाई समर्थन गर्न आफ्ना पूर्वाधारहरू विस्तार गरिरहेका छन्। अमेजन, माइक्रोसफ्ट र गुगलजस्ता कम्पनीहरूले एआई कार्यभारका आवश्यकताहरू पूरा गर्न डाटा सेन्टर लगानी तीव्र रूपमा बढाइरहेका छन्।

सोमबार अमेजनले पेन्सल्भानियामा डाटा सेन्टर पूर्वाधार विस्तार गर्नका लागि कम्तीमा २० अर्ब डलर लगानी गर्ने योजना सार्वजनिक गरेको थियो। यो लगानी कम्पनीको एआई विस्तार योजनाअन्तर्गत अघिसारेको अर्बौं डलरको थप हिस्सा हो।

जुनको सुरुवातमा अमेजनले उत्तर क्यारोलिनामा १० अर्ब डलर लगानी गर्ने घोषणा गरेको थियो र ताइवानमा नयाँ क्लाउड पूर्वाधार निर्माणका लागि ५ अर्ब डलरभन्दा बढी लगानी गर्ने योजना सार्वजनिक गरेको थियो।