आफ्नो ऊर्जा व्यवसाय संकटमा पार्ने विधेयक पारित नगर्न सिनेटरहरुसँग याचना गर्दै टेस्ला

काठमाडौं ।

बिजुली गाडीहरूको घट्दो मागबीच केही हदसम्म उज्यालो पक्षको रूपमा देखिएको टेस्लाको ऊर्जा व्यवसाय संकटमा परेको छ।

गएको साता हाउस रिपब्लिकनहरूले एउटा रिकन्सिलियसन विधेयक पास गरे, जसले इन्फ्लेशन रिडक्शन एक्टको धेरै भाग हटाउने प्रस्ताव गरेको छ। त्यसमा आवासीय सौर्य जडानका लागि दिइने कर छुट र सफा ऊर्जा परियोजनाहरूको कर क्रेडिट समावेश छन्। यो विधेयक अहिले सिनेटमा पुगेको छ।

यदि सिनेटले पनि यिनै खारेजसहित विधेयक पारित गरेको खण्डमा टेस्लाको ऊर्जा शाखामा गम्भीर असर पर्न सक्छ। उसले पहिलो त्रैमासिकमा २.७ अर्ब डलर आम्दानी गरेको थियो, जुन अघिल्लो वर्षको तुलनामा ६७ प्रतिशतले बढी हो।

टेस्लाका सीईओ ईलन मस्कले सरकारमा आफ्नो समय सकिएको बताएका छन्, तर कम्पनीले एक्स पूर्व ट्विटर) मा सांसदहरूसँग लबिङ गरिरहेको छ। टेस्ला इनर्जीले सिनेट रिपब्लिकनहरूसँग आग्रह गर्दै लेखेको छ: “ऊर्जा कर क्रेडिटहरू अचानक समाप्त गर्नुले अमेरिकाको ऊर्जा स्वतन्त्रता र ग्रिडको भरपर्दोपनमा खतरा पुर्‍याउँछ – हामी सिनेटलाई २५डी र ४८ई मा विवेकपूर्ण चरणबद्ध अन्त्यसहितको विधेयक पास गर्न आग्रह गर्छौं।”

टेस्लाको भनाइमा, “यसले एआई र घरेलु उत्पादन वृद्धिलाई समर्थन गर्न हरेक वर्ष ६० गिगावाट क्षमताको तीव्र विस्तार सुनिश्चित गर्छ।”

टेकक्रञ्चका अनुसार हाल नयाँ सौर्य जडान गराउने घरधनीहरूले ३० प्रतिशत कर छुट पाउँछन्, र सफा ऊर्जा परियोजनाहरूमा लगानी गर्नेहरूले पनि यस्तै सुविधा पाउँछन्।

यी प्रावधानहरू २०३२ को अन्त्यसम्म कायम रहने तय छ, तर हाउस रिपब्लिकनहरूले यो सुविधा चार वर्षअघि नै अन्त्य गर्न चाहेका छन् र परियोजना सुरु गर्न विधेयक पास भएको ६० दिनभित्र निर्माण थाल्नुपर्ने सर्त पनि राखेका छन्।

यदि यस्ता प्रावधानहरू काटिएमा हरेक वर्ष एआई र घरेलु उत्पादनलाई सघाउने ६० गीगावाट क्षमताको विस्तारमा खतरा पर्न सक्ने टेस्लाले चेतावनी दिएको छ।

ट्रम्प प्रशासनले इन्धन स्वामित्वलाई प्राथमिकता दिएको छ, तर सफा तथा नवीकरणीय ऊर्जाको विस्तार रोकिँदा त्यो लक्ष्य जोखिममा पर्न सक्छ।

गत वर्ष अमेरिकामा थपिएको कुल नयाँ ऊर्जा उत्पादन क्षमताको ९३ प्रतिशतथ सफा ऊर्जा थियो, जुन प्रायः सौर्य र ग्रिड-स्तरको भण्डारण प्रणाली थियो। यस वर्षको पहिलो त्रैमासिकमा नवीकरणीय ऊर्जाबाट ७.४ गीगावाट थपिएको छ, जुन अहिलेसम्मकै दोस्रो उत्कृष्ट पहिलो त्रैमास हो। नयाँ प्राकृतिक ग्यास टर्बाइनका लागि लाइन लामो छ, तर सौर्य फार्महरू सामान्यतया १८ महिनाभित्र निर्माण सकिन्छ।

धेरै आवासीय सौर्य जडान कम्पनीहरू जस्तै, टेस्ला को ऊर्जा व्यवसाय पनि कर प्रोत्साहनमा अत्यधिक निर्भर छ। रिपब्लिकनहरूले इन्फ्लेशन रिडक्शन एक्ट अर्थात् मुद्रास्फीति ह्रास ऐन खारेज गर्न प्राथमिकता दिएका कारण अमेरिकी सौर्य कम्पनीका सेयरमा गिरावट आएको छ। यो वर्ष एनफेजको सेयर मूल्य ४५ प्रतिशतले घटेको छ, सनरनको चौथाइ मूल्य घटेको छ भने फर्स्ट सोलरको सेयर १५ प्रतिशतले घटेको छ।