इलन मस्कको ब्रेन इम्प्लान्ट कम्पनी न्यूरालिङ्कले उठायो ६० करोड डलर लगानी

काठमाडौं ।

ईलन मस्कको ब्रेन इम्प्लान्ट कम्पनी न्यूरालिङ्कले ६० करोड डलर उठाएर कम्पनीको मूल्याङ्कन नयाँ लगानी आउनु अघि नै ९ अर्ब डलर पुर्‍याएको छ। यसबारे सेमाफोरले मंगलबार यस मामिलासम्बन्धी जानकारी राख्ने व्यक्तिहरूलाई उद्धृत गर्दै जानकारी दिएको हो।

निजी रूपमा गरिएको सेयर कारोबारका आधारमा यो स्टार्टअपको मूल्याङ्कन २०२३ मा ५ अर्ब डलर रहेको अनुमान गरिएको थियो। यसअघि कम्पनीले पिटर थिलको फाउन्डर्स फन्डको नेतृत्वमा भएको लगानी चरणमा २८ करोड डलर उठाएको थियो।

गत अप्रिलमा ब्लुमबर्ग न्यूजले कम्पनीले करिब ५० करोड डलर उठाउने योजना बनाइरहेको जनाएको थियो।

रोयटर्सका अनुसार न्यूरालिङ्क मेरुदण्डमा चोट भएका व्यक्तिहरूलाई सहयोग पुर्‍याउने उद्देश्यले बनाइएको इम्प्लान्टको परीक्षण प्रक्रियामा छ। उक्त यन्त्रले पहिलो बिरामीलाई भिडियो गेम खेल्न, इन्टरनेट चलाउन, सामाजिक सञ्जालमा पोस्ट गर्न र ल्यापटपमा माउस कर्सर चलाउन मस्तिष्कको सहायताबाट सक्षम बनाएको छ।

यसै महिनाको सुरुमा, न्यूरालिङ्कले आफ्नो यन्त्रका लागि अमेरिकी खाद्य तथा औषधि प्रशासन (एफडीए) को “ब्रेकथ्रु” ट्याग प्राप्त गरेको थियो।

मस्कले कम्पनीप्रति ठूला महत्वाकांक्षा व्यक्त गरेका छन्। उनले भनेका छन् कि कम्पनीको चिपले स्वस्थ तथा अपांग दुवै व्यक्तिलाई छरितो शल्यक्रिया मार्फत उपकरण जडान गर्न सहयोग गर्नेछ, जसबाट मोटोपन, अटिज्म, डिप्रेशन र स्किजोफ्रेनियाको उपचार सम्भव हुनेछ। उनले यसलाई वेब ब्राउजिङ र टेलिप्याथी (मनोसंवाद) का लागि समेत प्रयोग गर्न सकिने देखेका छन्।