Technology Khabar १५ जेष्ठ २०८२, बिहीबार
काठमाडौं ।
विवादित बनेको र भ्रष्ट्राचार भएको भनेर विशेष अदालतको फैसलाबाट प्रमाणित भएको मोबाइल डिभाइस म्यानेजमेन्ट सिस्टम (एमडीएमएस) फेरी संचालनमा ल्याउने सरकारी तयारी देखिएको छ।
संघीय संसदकाे संयुक्त बैठकमा आज आर्थिक वर्ष २०८२/८३ को बजेट प्रस्तुत गर्दै अर्थमन्त्री विष्णुप्रसाद पौडेलले आईएमईआई दर्ता प्रकृयाको व्यवस्था गरिने बताएका हुन्।
“मोबाइल सेटहरुको अवैध आयात र प्रयोगलाई रोक्न आईएमईआई दर्ता गर्ने व्यवस्था गरेको छु,” उनले घोषणा गरे।
उनले अवैधरुपमा हुने मोबाइल आयातलाई रोक्ने भन्दै एमडीएमएस संचालन गरिने बताएका हुन्।
हाल एमडीएमएसको कार्य ठप्प रहेको छ भने वैधानिकरुपमा आउने फोनहरुको आईएमईआई दर्ताको कार्य नियमितरुपमा संचालनमा रहेको छ।
आईएमईआई दर्ता प्रणालीमा वैधानिक तवरबाट ल्याईएका र आयात भएका मोबाइलहरु मात्र दर्ता गर्न सकिनेछ। यस बाहेक छिमेकी देश र तेस्रो मुलुकबाट अवैधरुपमा भित्रने फोनहरु दर्ता प्रणालीमा आएका छैनन्।
यसका साथै सरकारले ओटीटी सेवालाई समेत नियमन गर्ने घोषणा गरेको छ।
प्रकाशित: १५ जेष्ठ २०८२, बिहीबार
