युरोपमा स्मार्टफोन बजार २ प्रतिशतले घट्यो, प्रिमियम फोनहरू बढ्दै

काठमाडौं ।

क्यानालिसले भर्खरै युरोपेली बजारको सन् २०२५ को पहिलो त्रैमासिकको बारेमा आफ्नो रिपोर्ट सार्वजनिक गरेको छ। क्यानालिसको रिपोर्टले पहिलो त्रैमासिकमा युरोपेली बजारको समग्र बिक्रीमा सामान्य गिरावट देखाएको छ भने सम्पूर्ण बजार २ प्रतिशतले घटेको उल्लेख गरेको छ।

विक्रेताहरूले सन् २०२५ को पहिलो त्रैमासिकमा ३३.१ मिलियन युनिटहरू बिक्री गरेको र ती बिक्रीमध्ये लगभग ३२ प्रतिशत ८०० यूरो भन्दा माथि मूल्यका प्रिमियम फोनहरू भएको बताइएको छ। साथै एप्पल र सामसङ शीर्ष स्थानमा आउन सफल भएका छन्।

एप्पलले वर्षिक रुपमा कुल बिक्रीमा १० प्रतिशत वृद्धि हासिल गर्दै २२ प्रतिशत बजार हिस्साको साथ दोस्रो स्थानमा रहेको छ। सामसङको वृद्धि भने १ प्रतिशत भन्दा कमले बढेको उल्लेख गरिएको छ। तैपनि, सामसङ ३७ प्रतिशत बजार हिस्साको साथ चार्टको शीर्ष स्थानमा रहेको र युरोपेली बजारमा यसको उच्चतम औसत बिक्री मूल्यमा पुगेको जनाइएको छ।

शाओमी भने १६ प्रतिशत जार हिस्सा र बजेट डिभाइसहरूको कमजोर मागको कारण बिक्रीमा २ प्रतिशत गिरावटको साथ तेस्रो स्थानमा रहेको छ। युरोपको शीर्ष पाँचभित्र परेको कम्पनीको यो लगातार बीसौं त्रैमासिक भएको उल्लेख गरिएको छ।

त्यसैगरी मोटोरोला र गुगल पनि शीर्ष पाँचमा पर्न सफल भएका छन्। सन् २०२५ को पहिलो त्रैमासिक गुगलको लागि युरोपमा शीर्ष पाँच भित्रको पहिलो त्रैमासिक भएको बताइएको छ जसले ०.९ मिलियन ढुवानी र यस क्षेत्रमा उत्कृष्ट ४३ प्रतिशत वृद्धि रेकर्ड गरेको उल्लेख गरिएको छ।

आगामी दिनहरुमा सामसङ र एप्पलको प्रिमियम डिभाइसहरूको बलियो माग जारी रहने र कडा प्रतिस्पर्धा पनि जारी नै रहने विश्लेषकहरूको विश्वास रहेको जनाइएको छ। यद्यपि इको–डिजाइन र ब्याट्री निर्देशन जस्ता युरोपेली नियमहरूले लो–इण्ड डिभाइसहरूको लागि प्रतिकूल बजार अवस्था सिर्जना गर्न जारी राख्ने विश्लेषकहरूले थप विश्वास व्यक्त गरेका छन्।

वास्तवमा, सन् २०२५ को लागि बिक्रीमा ३ प्रतिशतको गिरावट र सन् २०२६ मा १ प्रतिशतको सामान्य रिकभरीको पूर्वानुमान गरिएको छ। विक्रेताहरू यस क्षेत्रमा टिकिरहनको लागि दक्षता र नाफामा सुधार गर्न बाध्य हुनेछन् भनि जीएसएमएरिनाले उल्लेख गरेको छ।