काठमाडौं ।
अमेरिकी राष्ट्रपति डोनाल्ड ट्रम्पले आयातित आइफोनमा शुल्क लगाउने चेतावनी दिएपछि चीनमा सूचीबद्ध एप्पल आपूर्तिकर्ता कम्पनीहरूको सेयर मूल्य सोमबार घटेको छ।
आइफोन एसेम्बल गर्ने र एयरपड बनाउने लक्शेयरको सेयर २.२प्रतिशत ले घट्यो भने मोबाइल स्क्रिन निर्माता लेन्स टेकको सेयर १.८ प्रतिशतले घट्यो। एयरपड निर्माता गोएर्टेकको सेयर १.१ प्रतिशतले ओरालो लाग्यो।
शुक्रबार ट्रम्पले व्यापार युद्ध फेरि चर्काउने चेतावनी दिएका थिए र एप्पललाई लक्ष्य गर्दै उनले अमेरिका बाहिर बनेका तर अमेरिका भित्र बिक्री हुने आइफोनहरूमा २५प्रतिशत शुल्क लगाउने बताएका थिए, जुन कामका अवसरहरू पुन: अमेरिकामा ल्याउने आफ्नो प्रशासनको उद्देश्यसँग जोडिएको थियो।
उनको यो धम्की र जुन १ देखि ५० प्रतिशत शुल्क लगाउने दोस्रो चेतावनीसँगै, केही हप्ता देखिको व्यापार तनाव घटाउने प्रयासपछि व्यापार युद्ध फेरि चर्किने चिन्ता बढेको रोयटर्सले उल्लेख गरेको छ।
अप्रिलको सुरुमै ट्रम्पले विश्वका अधिकांश देशहरूमा घोषणा गरेका कडा शुल्कहरू सेयर बजारमा तीव्र गिरावट आएपछि ह्वाइट हाउसले अस्थायी रूपमा रोकेको थियो। तर, उनले अधिकांश आयातमा १० प्रतिशत आधारभूत कर कायम राखे र चिनियाँ सामानमा लागेको १४५ प्रतिशत कर घटाएर ३० प्रतिशत बनाएका थिए।
एप्पलले चीनमा लाग्ने सम्भावित शुल्कलाई मध्यनजर गर्दै सन् २०२६ को अन्त्यसम्म अमेरिकामा बिक्री हुने अधिकांश आइफोनहरू भारतका कारखानामा निर्माण गर्ने योजना तीव्र बनाइरहेको छ।
तर, उत्पादनलाई अमेरिका सार्ने सम्भावना न्यून देखिन्छ। वाणिज्य सचिव हावर्ड लुटनिकले गत महिना भनेका थिए, “लाखौं मानिसहरूले साना-साना पाङ्ग्रा जोडेर आइफोन बनाउने काम अब अमेरिका आउनेछ र यसलाई स्वचालित बनाइनेछ,” जसबाट मिस्त्री र इलेक्ट्रिसियनजस्ता दक्ष कामदारहरूका लागि रोजगारी सिर्जना हुने बताइएको थियो।
तर उनले पछि एप्पल प्रमुख टिम कुकलाई उद्धृत गर्दै यस्तो काम गर्न आवश्यक प्रविधि हाल उपलब्ध नभएको बताएका थिए।
प्रकाशित: १२ जेष्ठ २०८२, सोमबार
