Technology Khabar ९ जेष्ठ २०८२, शुक्रबार
काठमाडौं ।
सामाजिक सञ्जाल फेसबुकमार्फत् एक सरकारी कर्मचारीलाई ‘हनी ट्र्याप’ मा फसाएको आरोपमा प्रहरीले दुई जना महिलालाई पक्राऊ गरेको छ।
पक्राऊ पर्नेमा कैलालीको गोदावरी नगरपालिका–१० दमौरा घर भई काठमाडौं महानगरपालिका–५ कालोपुल बस्ने ३४ वर्षीया ममता तामाङ र भक्तपुरको भक्तपुर नगरपालिका–१७ सल्लाघारी घर भइ काठमाडौं हाँडिगाउँ बस्ने ३४ वर्षकै आँचल श्रेष्ठ भनिने आँचल चौगुठी रहेका बुझिएको छ।
उनीहरुले फेसबुकमार्फत् साथी बनाएर ठमेलमा कफी तथा खानाका लागि भनेर बोलाई मदिरा पिलाएर आफ्ना सहयोगीमार्फत् आफूहरुसहितको आपत्तिजनक फोटो खिचेर त्यसैका आधारमा काठमाडौंमा एउटा घर वा चार आना जग्गा माग गरेको र नमानेमा बलात्कार केसमा हालिदिने धम्की दिएको प्रहरीले जनाएको छ।
ती कर्मचारीले पनि शुरुमा मिलाउन खोजेको र अन्त्यमा केही नलागेपछि ५ लाख रुपैयाँको चेक दिएर बाँकी पैसा पछि दिने शर्तमा चेक लिन बोलाएर प्रहरीमार्फत् पक्राऊ गराएको बुझिएको छ।
उनीहरुले फेसबुकमा ‘टिकटक गर्ल’ नामको आईडी बनाएर त्यसैमार्फत् साथी बन्ने, च्याट गर्ने र विश्वासमा पारेर भेट्न बोलाई बार्गेनिङ गरेको पाइएको छ।
प्रहरीका अनुसार यसरी समस्या निकै गहिरिएपछि ती कर्मचारी गत बुधबार काठमाडौं उपत्यका अपराध अनुसन्धान कार्यालय टेकुमा पुगेर उजुरी दिएका हुन्। उजुरी पश्चात् प्रहरीकै योजनामा ५ लाखको चेक दिन बोलाएर पक्राऊ गरेको बुझिएको छ।
पक्राऊ परेका उनीहरुबाट प्रहरीले आँचलको नामको ५ लाखको चेक तथा दुई थान मोबाइल पनि बरामद गरेको छ।
प्रकाशित: ९ जेष्ठ २०८२, शुक्रबार
