Technology Khabar ९ जेष्ठ २०८२, शुक्रबार
काठमाडौं ।
एप्पल डब्लूडब्लूडीसी २०२५ अर्थात् एप्पल वर्ल्डवाइड डेभलपर कन्फ्रेन्सको सन् २०२५ संस्करण आगामी जुनमा हुने पक्का भएको छ। यो वर्षको प्रविधि क्षेत्रको महत्त्वपूर्ण कार्यक्रममध्ये एक मानिने डब्लूडब्लूडीसी २०२५ जुन ९ देखि सुरु हुनेछ, जसको उद्घाटन सत्रमा एप्पलका सीईओ टिम कुक सहभागी हुनेछन्।
न्युज१८ का अनुसार यो वार्षिक कार्यक्रममा एप्पलले नयाँ आईओएस, आईप्याडओएस र म्याकओएस संस्करण सार्वजनिक गर्ने गर्छ र ती संस्करणका नयाँ फिचरहरू विश्व सामु प्रस्तुत गरिन्छ। यसपटकको डब्लूडब्लूडीसी पनि यसै ढाँचामा अघि बढ्ने अपेक्षा गरिएको छ, यद्यपि केही नयाँ र सोचेभन्दा फरक कुराहरु पनि हुन सक्ने सम्भावना छ।
प्रमुख उद्घाटन कार्यक्रमपछि प्लेटफर्म्स ‘स्टेट अफ द युनियन’ सत्र हुनेछ, जसमा विकासकर्ताहरूलाई एप्पलका विभिन्न प्लेटफर्ममा आउने नयाँ फिचरहरू र सुधारहरूबारे विस्तृत जानकारी दिइनेछ।
एप्पलले यसपटक १०० भन्दा बढी सेसनहरू आयोजना गर्नेछ, जसमा एप्पलका विशेषज्ञहरूले विकासकर्ताहरूलाई नयाँ संस्करणहरूको प्राविधिक पक्षबारे बुझाउने छन्।
साथै डेभलपर प्रोग्राम र डेभलपर इन्टरप्राइज सदस्यहरूलाई एप्पलका विशेषज्ञहरूसँग प्रत्यक्ष भेटघाट र एक्लाएक्लै सेसनको सुविधा पनि दिइनेछ, जसमा एप्पल एआई, स्विफ्ट आदि विषयहरू समेटिनेछन्।
डब्लूडब्लूडीसी २०२५ कार्यक्रमलाई एप्पलको आधिकारिक यूट्युब च्यानल र इभेन्ट्स पेजमार्फत अनलाइन प्रत्यक्ष प्रसारण गरिनेछ। साथै, सीमित व्यक्तिहरूलाई क्यालिफोर्नियाको एप्पल पार्कमा प्रत्यक्ष रूपमा कार्यक्रममा सहभागी हुने अवसर पनि दिइनेछ।
यस सम्मेलनमार्फत पहिलोपटक आईओएस १९ को औपचारिक झलक देखिनेछ, जुन यसपटक ठूलो डिजाइन परिवर्तनसहित आउने चर्चा छ। यद्यपि परिवर्तन केवल आईओएसमा मात्र सिमित नरहने र एप्पलले आफ्नो सम्पूर्ण उत्पादनहरूलाई एकीकृत इकोसिस्टममा जोड्ने प्रयास गर्ने अपेक्षा गरिएको छ।
यसका लागि म्याकओएस, आईप्याडओएस र वाचओएसमा समेत उल्लेखनीय सुधार आउनेछ। एप्पलएआई यसपटकको प्रमुख विषय हुने सम्भावना छ, तर सिरी एआई भने यसपटकको कार्यक्रममा समावेश नहुने अनुमान गरिएको छ, किनकि यो अझै गुगल र ओपनएआई जस्ता प्रतिस्पर्धीसँग प्रतिस्पर्धा गर्न कठिनाइ भोगिरहेको छ।
प्रकाशित: ९ जेष्ठ २०८२, शुक्रबार
