एप्पलद्वारा स्पोटिफाईको नयाँ एप अपडेट स्वीकृत, अमेरिकामा प्रयोगकर्ताले एपमै अडियोबुक किन्न सक्ने

काठमाडौं ।

एप्पलले स्पोटिफाईको नयाँ एप अपडेट स्वीकृत गरेपछि अब अमेरिकाका आइफोन प्रयोगकर्ताले स्पोटिफाई एपमै अडियोबुक किन्न सक्ने भएका छन्। प्रयोगकर्ताले अडियोबुकको मूल्य हेर्न र सुरुमा पाइने १५ घण्टाभन्दा बढी समयका लागि थप सुनाइ समय पनि सजिलै किन्न सक्ने भएका छन्।

“यो परिवर्तनले प्रयोगकर्तालाई पहिलो वा दसौँ अडियोबुक सुन्न सहज बनाउनेछ, र प्रकाशक तथा लेखकलाई आफ्ना फ्यानसम्म पुग्न तथा नयाँ दर्शकसम्म पुग्न सजिलो बनाउनेछ,” कम्पनीले सोमबारको घोषणामा भनेको छ।

टेकक्रञ्चका अनुसार यो लामो समयदेखि अपेक्षित अपडेट अमेरिकाको एक पछिल्लो अदालतको निर्णयपछि आएको हो, जसले एप्पललाई एप स्टोरबाहिर गरिने खरिदमा शुल्क लिन रोक लगाएको थियो।

अब प्रयोगकर्ताले आईओएस एपभित्रै अडियोबुक खरिद गर्न सक्ने र मूल्य पनि देख्न सक्ने भएकाले अघिल्लो अवस्थामा जस्तै वेबमा गएर अडियोबुक किन्नुपर्ने बाध्यता हटेको छ। एप्पलको एपभित्रै खरिद गर्न नपाइने कडा नियमका कारण स्पोटिफाईले २०२२ मा अडियोबुक खरिद सुविधा हटाएको थियो। अब भने प्रयोगकर्ताले केही ट्याप मात्र गरेर अडियोबुक किन्न सक्नेछन्।

त्यसैगरी, आइफोन प्रयोगकर्ताले अघिल्लो समयमा “टप-अप” भनिने थप ‘सुन्ने समय’ किन्न वेबमा जानुपर्ने हुन्थ्यो। अब भने एपभित्रै १३ डलर तिरेर १० घण्टाको अतिरिक्त समय किन्न सक्ने भएका छन्।

यस महिनाको सुरुमा स्पोटिफाईले आइफोन प्रयोगकर्तालाई एप स्टोरबाहिरै गएर सदस्यता किन्न दिने सुविधा ल्याएको थियो, जसमा एप्पलले मूल्य जानकारी र बाह्य भुक्तानी लिंक देखाउने अपडेट स्वीकृत गरेको थियो।