खाडी देशमा अमेरिकाबाहिरको सबैभन्दा ठूलो एआई क्याम्पस निर्माण गर्न यूएई र अमेरिकाको सम्झौता

काठमाडौं ।

यूएई र संयुक्त राज्य अमेरिकाले खाडी देशमा अमेरिकाबाहिरको सबैभन्दा ठूलो कृत्रिम बुद्धिमत्ता (एआई) क्याम्पस निर्माण गर्न सम्झौता गरेका छन्। यस्ता प्रकारका सम्झौतामा विगतमा वाशिङ्टनले चिनियाँ पहुँचको सम्भावनाबारे चिन्ताका कारण प्रतिबन्ध लगाउँदै आएको थियो।

दुवै देशले यूएईका डाटा सेन्टरहरूमा एनभिडाया वा अन्य कम्पनीका कुन एआई चिपहरू समावेश हुने भन्ने खुलाएका छैनन्, तर स्रोतहरूले यस सम्झौताले खाडी देशलाई उच्च प्रविधिका एआई चिपहरूमा विस्तार गरिएको पहुँच दिने बताएको रोयटर्सले उल्लेख गरेको छ।

बिहीबार अबु धाबीस्थित एक दरबारमा एनभिडियाका प्रमुख कार्यकारी जेन्सेन हुआङलाई अमेरिकी राष्ट्रपति डोनाल्ड ट्रम्प र यूएईका राष्ट्रपति शेख मोहम्मद बिन जायद अल नाहयानसँग कुराकानी गरिरहेको टेलिभिजन फुटेजमा देखाइएको थियो।

बिहीबार ट्रम्पको अबु धाबी भ्रमणको क्रममा अन्तिम रूप दिइएको यस सम्झौतालाई यूएई को लागि ठूलो उपलब्धि मानिएको छ। यूएई लामो समयदेखि आफ्नो पुरानो मित्र अमेरिका र प्रमुख व्यापारिक साझेदार चीनसँग सम्बन्ध सन्तुलनमा राख्न प्रयासरत छ।

यसले ट्रम्प प्रशासनले अमेरिकी चिपहरूको सुरक्षा व्यवस्थापन सुनिश्चित गर्न सक्छ भन्ने विश्वास प्रकट गर्छ, विशेष गरी डेटा सेन्टरहरू अमेरिकी कम्पनीहरूले सञ्चालन गर्नुपर्ने सर्तमार्फत।

तेल उत्पादक देश यूएई ले विश्वव्यापी एआई शक्ति बन्ने उद्देश्यले अर्बौं डलर खर्च गरिरहेको छ। तर, चीनसँगको सम्बन्धका कारण पूर्व राष्ट्रपति जो बाइडेनको कार्यकालमा यूएई लाई अमेरिकी चिपहरूमा सीमित पहुँच थियो।

शुक्रबार व्हाइट हाउसले भनेको छ, “यस सम्झौतामा यूएई ले अमेरिका सरह ठूलो र शक्तिशाली डाटा सेन्टर निर्माण, लगानी वा वित्तीय सहयोग गर्न सहमति जनाएको छ।”

“यस सम्झौतामा यूएईले आफ्नो राष्ट्रिय सुरक्षा नियमहरूलाई अमेरिका सँग मिल्दोजुल्दो बनाउने ऐतिहासिक प्रतिबद्धता जनाएको छ, जसमा अमेरिकी प्रविधि अन्यत्र मोडिन नदिन कडा सुरक्षा उपायहरू पनि समावेश छन्।”

यूएई लाई सन् २०२५ देखि हरेक वर्ष एनभिडियाका सबैभन्दा उन्नत एआई चिपमध्ये ५ लाख थान आयात गर्न अनुमति दिइन सक्नेछ। एनभिडियाले यसबारे टिप्पणी गर्न अस्वीकार गरेको छ। यूएई को परराष्ट्र मन्त्रालयले भने तुरुन्त प्रतिक्रिया दिएको छैन।

बिहीबार घोषणा गरिएको सम्झौतामा मुख्य रूपमा अबु धाबीमा १० वर्ग माइल (२५.९ वर्ग किलोमिटर) क्षेत्रफलमा निर्माण हुने एआई क्याम्पस रहेको छ, जसमा एआई डाटा सेन्टरहरूको लागि ५ गिगावाट विद्युत् क्षमता हुनेछ, अमेरिकी वाणिज्य विभागले बताएको छ।

“अहिलेसम्म हामीले देखेका सबै प्रमुख एआई पूर्वाधार घोषणाहरूभन्दा यो ठूलो हो,” र्याण्ड कर्पोरेशनका विश्लेषक लेन्नार्ट हेइमले एक्समा लेखेका छन्। उनका अनुसार, यसले एनभिडिया का शीर्ष श्रेणीका बी२०० चिपमध्ये २५ लाखवटासम्मलाई समर्थन गर्न सक्ने क्षमता राख्छ।

यो क्याम्पस अबु धाबीको राज्य-समर्थित कम्पनी जी४२ ले निर्माण गर्नेछ, तर अमेरिकी वाणिज्य सचिव हवार्ड लुट्निकले जारी गरेको विज्ञप्तिमा भनेका छन्, “अमेरिकी कम्पनीहरूले डेटा सेन्टर सञ्चालन गर्नेछन् र सम्पूर्ण क्षेत्रभर अमेरिकी व्यवस्थापनमा आधारित क्लाउड सेवा प्रदान गर्नेछन्।”

अमेरिकी तथ्यपत्रहरूमा चिप कम्पनी क्वालकमले एआई सम्बन्धित इञ्जिनियरिङ केन्द्रमा काम गरिरहेको उल्लेख छ र अमेजन वेब सर्भिसेजले स्थानीय साझेदारहरूसँग साइबर सुरक्षा र क्लाउड प्रविधिको प्रयोग प्रवर्द्धनमा सहकार्य गर्ने बताइएको छ।