अनलाइनका कारण साइबर क्राइम बढ्यो, ४० हजारभन्दा बढी उजुरी छन्: मन्त्री गुरुङ

काठमाडौं ।

सञ्चार तथा सूचनाप्रविधिमन्त्री पृथ्वी सुब्बा गुरुङले सामाजिक सञ्जाल प्रयोग र अभिव्यक्ति स्वतन्त्रताका नाममा समाजमा भ्रम फैलाउन कसैलाई छुट नभएको बताएका छन्।

सुर्खेतबाट प्रकाशन हुँदै आएको युगआह्वान राष्ट्रिय दैनिकको २५ औं रजतजयन्तीका अवसरमा मंगलबार आयोजित कार्यक्रममा उनले सामाजिक सञ्जाल नियमन विधेयकमा समाजका केही वर्गले गलत अर्थ लगाएका बताए।

सरकारले स्वतन्त्र प्रेसमाथि हस्तक्षेप नगरेको बताउँदै मन्त्री गुरुङले प्रेस स्वतन्त्रताका नाममा अराजकता बढेको उल्लेख गर्दै यसलाई नियन्त्रण गर्न वर्तमान सरकार क्रियाशील रहेको प्रतिबद्धता व्यक्त गरे।

सामाजिक सञ्जाल नियमनसम्बन्धी विधेयकको मस्यौदा तयारीको क्रममा रहेको अवगत गराउँदै उनले भने, ‘‘हाम्रो देशमा प्रेस स्वतन्त्रताको नाममा अराजकता, अनुशासनहीनता बढ्यो, यसलाई नियमन गर्नैपर्छ, त्यसका लागि आम सञ्चार विधेयक बनाउने तयारीमा छौँ।’’

साथै मन्त्री गुरुङले कुनै पनि सञ्चारमाध्यमले जातीय सद्भावमा खलल गतिविधि गर्ननहुनेमा जोड दिए। सामाजिक सञ्जाललाई नियमन गर्ने विधेयक शीघ्र पारित गरिने बताउँदै उनले अनलाइनका कारण साइबर क्राइम बढेको उल्लेख गर्दै उनले ४० हजारभन्दा बढी त्यससम्बन्धी उजुरी दर्ता भएको आँकडा प्रस्तुत गरे।-रासस