गुगल म्याप्सको नयाँ सुविधा आईओएसमा रोल आउट, एन्ड्रोइडको लागि पछि जारी गरिने

काठमाडौं ।

गुगलले मार्च महिनामा गुगल म्याप्सको लागि डिभाइसमा सेभ गरिएका स्क्रिनसटहरूबाट ठेगानाको बारेमा जानकारी निकाल्न सक्ने एक उपयोगी नयाँ टुल प्रस्तुत गरेको छ।

जेमिनीद्वारा संचालित, यो सुविधाले स्क्रिनसटहरूमा उल्लेख गरिएका स्थानहरू पहिचान गर्ने र स्वचालित रूपमा तिनीहरूलाई सूचीमा थप्ने जनाइएको छ। यो उपयोगी सुविधा आईओएसमा गुगल म्याप्समा रोल आउट हुन थालेको भनिएको छ भने दुर्भाग्यवश एन्ड्रोइडको लागि अझै रोल आउट नहुने उल्लेख गरिएको छ।

बिहीबार प्रकाशित ब्लग पोस्टमा, यो सुविधाले कसरी काम गर्छ भन्ने बारेमा गुगलले थप विवरणहरू साझा गरेको छ। गुगल म्याप्स एप खोलेपछि “ट्राइ इट आउट !” भनेर मार्क (चिन्ह) लगाइएको “यु” ट्याबको टप (शीर्ष)मा स्क्रिनसटहरू देखा पर्नेछ। यसमा क्लिक गर्नाले सुविधाको व्याख्या गर्ने छोटो भिडियो खुल्ने र यसलाई हेर्दै तुरुन्तै प्रयोग गर्न पनि सकिने उल्लेख गरिएको छ।

एपलाई फोटोहरू भ्यू (हेर्न) गर्न अनुमति दिएपछि गुगल म्याप्सले डिभाइसमा रहेको स्क्रिनसटहरू एक्सेस (पहुँच) गर्नेछ। साथै यसमा धेरै अनुमति विकल्पहरू बीच छनौट गर्न सकिने र यदि पूर्ण पहुँच दिन नचाहने हो भने म्यानुअल मोड प्रयोग गर्न सकिने उल्लेख गरिएको छ।

एक पटक अनुमतिहरू सेट भएपछि, म्याप्सले स्थान जानकारी भएको स्क्रिनसट लिँदा स्वचालित रूपमा पहिचान गर्नेछ। त्यसपछि रिभ्यू (समीक्षा) को लागि नयाँ स्थानहरू फेला परेको जानकारी दिने एउटा नोटिफिकेसन (सूचना) देखा पर्नेछ।

त्यसैगरी तिनीहरूलाई क्लिक गरेर हेर्न र गुगल म्याप्स एप भित्र आफ्नो सूचीमा सेभ गर्ने कि नगर्ने भनेर निर्णय गर्न सकिने उल्लेख गरिएको छ।

म्यानुअल विकल्पबाट पनि आफैले स्क्रिनसटहरू अपलोड गर्न सकिने छ। “यु” ट्याबमा रहेको स्क्रिनसट सेक्सनमा गएर एक पटक सेभ गरिसकेपछि, यी स्थानहरू सिधै म्याप्स देखा पर्नेछन्, वा तिनीहरूलाई “यु” ट्याब मार्फत पहुँच गर्न सकिनेछ।

एन्ड्रोइड प्रयोगकर्ताहरूले भने यस सुविधाको लागि पर्खनु पर्नेछ। गुगलले यो सुविधा एन्ड्रोइडमा पनि आउने पुष्टि गरेको भए पनि निश्चित समयसीमाको बारेमा भने केही पनि नबताएको टेलिग्राफले उल्लेख गरेको छ।